Ka Rifiness Warjri ka samla kaba dang 20 snem ka rta ka la wan phai sha la iing hadien ba ka la pyndep ia ka jingkiew ia u Lum Everest kum kawei na kiba khynnah tam ban poi sha kane ka kyrdan.
Ka Rifiness Warjri ka la kiew ia u Mount Everest ha ka 18 tarik u May 2025, ha ka jingjrong kaba 8,848 meter, ha kaba ym tang ba ka mihkhmat na ka jylla, hynrei ka ka la mihkhmat tang marwei na ka thaiñ shatei lammihngi.
Ka Rifiness ka la long ka nongkiew lum kaba saw na Meghalaya ban ieng ha jrong jong u lum Everest—hadien jong ki riew pawnam Gary Jarman Lamare (2012), Wansuk Myrthong (2013), bad ka Dolyne Kharbhih (2013). Hynrei ka jinglong shlur jong ka, ka ai mynsiem ia kiwei pat ki khynnah samla ban trei shitom khlem jingtieng jingsmiej haduh ba kan da lah ban poi sha ka thong jong ka jingjop.
Ka Refiness Warjri ka dei ka samla pule jong ka St Anthony’s College bad ka dei ruh ka NCC Batch jong ka 61 Meghalaya BN .
Ia ka Refiness Warjri la pdiang burom da ka Major AK Warjri 61 Meghalaya Girl BN NCC ha ryngkat ka jingiadonlang ki kmie ki kpa ki bahaing bahasem ki nongialam shnong ki dkhot sengbhalang bad ki khynnah jong ka NCC.
Haba ioh ban iakren bad ka Refiness Warjri ka la ong ba ka ai khublei ia u Blei ba la don ryngkat lang naduh ba mih na ïing haduh da wanphai bad kam don kano kano ka jingsngewsih ne kano kano ka jingpang bad dei lyngba ka jingiada jong u Blei bad ka la pynpaw ruh ka jingsngewnguh ia ka NCC kaba la plie lad ban ioh kiew ia u Mount Everest bad kumjuh ia i mei i pa kiba la shah ban leit sha ka rynsan ban kiew ia u Lum Everest.
Shuh shuh ka la iathuh ba ka jingshah jied ka shim por 8 haduh 9 bnai, ban kiew ia u Mount Everest ka shim por haduh 3 bnai, bad kam long shisha kaba suk ban kiew ia u Lum Everest bad baroh ka dei ka jingpyniaid jong u Blei.
Haba iadei bad ka jingkiew ia u lum Everest ka Refiness Wajri ka la iathuh baroh kawei ka Ri India na ki 17 lak ki NCC Cadet tang 10 ngut kiba shah jied kynthup 5 ngut ki shynrang bad 5 ngut ki kynthei bad ka samla Refiness Warjri ka dei tang ma ka marwei ka samla Kynthei NCC na ka jylla bad na ka thain shatei lam mihngi kaba shah jied ban kiew ia u lum Everest.
