Ka Shillong Lajong watla ka la ioh wan rung biang ha ka jylli jong ka Lympung I-league ha kane ka aïom ba lah dep, kata na ka bynta u snem 2023-24 hynrei kaba pyndiaw khyndiat ka long ki khlem ioh ban don ha ka kyrdan ba ha khmat bad khamtam ban ïoh ïalehkai ha ka lympung Indian Super League (ISL).
U Jose u dei u coach uba na ka ri Spain bad u la ioh ban soi ia ka kontrak kaba nyngkong bad ka Lajong ha ka aïom ïalehkai jong u snem 2019-20 bad ha katei ka snem u la lah ban iarap ia ka kynhun ban ioh rah ia ka nam lahduh jong ka lympung Meghalaya League bad Shillong Premier League. Ka jingwanphai jong u Carlos mynta ka samoi kan don ka jingkyrmen ia kane ka kynhun ba kan lah ban ïalehkai bha ia ka lympung Durand Cup ka ban sdang mynta u bnai bad ha ka I-league ka ban sa sdang noh shen. U Jose u dei ruh u coach uba la ioh bha ia ka jingithuh ha India ha kaba u la coach rub ia ka klob kaba don mynta ha ka lympung ISL ha ka aïom ïalehkai jong u snem 2021-22.
Ha kane ka samoi ba lah dep, ka Lajong ka la ioh ia ka kyrdan ba 8 na 24 sien ki jingialehkai ha ka lympung I-league bad ha ka jingialehkai ha ka jylla kaba kynthup ia ka Shillong Premier League bad Meghalaya League kane ka kynhun ka khlem ioh trophi ei ei. Kyrmen ba ka jingdon jong une u nongialam ba na Spain kan don ka jingkylla bad ka jingkiew ha ka klob.