Ka Samla Daniella I. Wanda Mylliemngap ka la lah ban wanrah nam ia ka jylla baroh kawei hadien ka jinglah jong ka ban khur ia ka takma Rnong ha ka lympung Asian Kickboxing Championship, kaba la pynlong ha Cambodia.
Katei ka takma ka la wan hadien ba ka lah ban iakhun haduh kaba kut ha ka thup (category) K1 56 kilo jong ki kynthei.
Na ka liang ka Meghalaya Sports & Youth Affairs (MS&YA) ka la pynpaw ia ka jingsngewkmen bad ka jingsngewsarong ia ka Samla Wanda namar ka jinglah jong ka ban wanrah burom ia ka jylla khamtam ban kyntiew ka jingioh takma na ka bynta ka kynhun Meghalaya State Kickboxing Association (MSKA). Ka MS&YA ka la ai ruh ka jingiaroh namar ka jingtrei shitom bad ka jingkheiñ duh ban leit iakhun marwei na ka bynta kane ka lympung. Lyngba katei ka takma mynta ka MSKA la ioh ban lum haduh 222 tylli ki takma kynthup 41 tylli kiba la ioh lyngba ka jingiakhun shabar ri (international).