![](https://i0.wp.com/yutipnews.com/wp-content/uploads/2024/07/WhatsApp-Image-2024-07-15-at-7.42.33-PM-1024x575.jpeg?resize=640%2C359&ssl=1)
Ka Hynniewtrep Youth Council (HYC) hapoh ka jingialam jong u President ka seng, u Bah Roy Kupar Synrem mynta ka sngi ka 15 tarik Naitung ki la leit ban hiar bran bran sha Ganesh Das Govt. M&CH Hospital kaba don ha Lawmali, Shillong, hadien ba mih ka jingpyntip (Notification 5 dated 5 Naitung, 2024) bad khamtam ka jingud bad ka jingujor jong ki paidbah halor ka jingbuh dor ka Ganesh Das ia ka bai sumar ia ki khyllung ha Insentive Care Unit (ICU) jong kane ka Hospital.
Haba kren sha ki ladpathai khubor, hadien kane ka jingiakynduh, na ka liang u Bah Roy, u la iathuh ba ha kane ka jingiakynduh bad ka Medical Superintendent, kane ka hospital ka la pynshai sha ka Seng ba kane ka pisa ka dei ka jingthmu na ka bynta ban pyniaid beit ia ki kam ki jam ha ka building jong ka ICU kaba dang shu dep ban plie thymmai.
Haba ka seng ka la buh ia ka jingkylli na ka bynta ki longīing ki ba kiba duna ka ïoh ka kot lane ki bym lah ban siew ia ka dor ba la buh da ka hospital, ka Medical Superintendent ka la iathuh ba ka hospital kan pdiang ia ki MHIS, bad ka hospital kan buh ruh da ka MHIS cell na ka bynta ki longïing ki bym pat dep ban register ia u MHIS bad ka Adhar card.
Nalor kata, ka Medical Superintendent ka la pyntip ruh ba kino kino ki bym don ia ka MHIS ki lah ban pyndonkam da ki ration card BPL ban ioh ei ia ka jingsumar ha ICU. Na ka bynta kito ki nongshah sumar ki bym don Ration card lane MHIS card, ka hospital kan pdiang ia ki ryngkat ki jingpynshisha na u Rangbah shnong ba ki wan na ka longīing ba duna ka ioh ka kot.
![](https://i0.wp.com/yutipnews.com/wp-content/uploads/2024/07/WhatsApp-Image-2024-07-15-at-7.42.57-PM.jpeg?resize=640%2C370)