U Sheen Sohktung uba la don bynta bad ka klob Shillong Lajong naduh u snem 2018 u la jied ban wanphai sha la ïing bad ban ialehkai na ka bynta ka klob na ka Jylla hadien ba la mad bun tylli ki klob kynthup ia ka klob kaba paw ka ri, kata ka Sudeva Delhi FC.
U Sheen u dei ruh u ‘rangialehkai ka kynhun Meghalaya bad nalor ka Delhi u la don bynta ruh ha ka klob na Langsning FC, Guwahati City Football Club, Ryntih Sports and Cultural Club, Kenkre FC, bad Diamond Harbour Football Club. Ka jingiaid lynti jong u kum u ‘rangialehkai ka la kham jrong watla u dang don mynta 27 snem ka rta.
Ha ka jingdon bynta jong u ha ka Lajong ha u snem 2018-19 u la long uwei na ki rangialehkai ba kongsan ha kaba u la ioh ruh ban thep kol ha ka lympung I-League jong katei ka samoi. Namar ka jinglah jong u ban kyntiew ia ka klob, ka klob ka la mynjur ban wanrah biang ia une u snar ïalehkai na ka bynta ka jingiakhun ha ka I-League 2024-25.
