Hadien ba ka Seng Jaiñtia Students’ Movement (JSM) ka la ioh ka jingujor ba ki kato katne ngut ki nongtrei trai ri ba trei hapoh ka Company Dalmia kaba don ha shnong Tangskai, East Jaintia Hills kila shah behkam noh, mynta ka sngi 8.11.2021, ki nongialam bad ki dkhot kane ka seng ki la hiar sha kane ka Company ban tuklar ia katei ka kam .
Ha kane ka jingleit jong ka JSM ka la mih ka thma ktien hapdeng ki bor Pulit bad ki dkhot ka Seng JSM.
Hadien ka jingtuklar bad ka jingiakren ka Seng bad ki bor pyniaid jong katei ka Company, ki Nongtrei trai ri ba la shah beh kam ki la ioh lad biang ban bteng ia ka jingtrei jong ki ha katei ka Company.
“Kane ka jingjia shah beh kam, jingshah lehbeiñ, shah niew shiliang ki briew jong ngi ha ki dkhar bar jylla bunsien ka shait jia khah khah” long ong ka JSM. Kumta ka seng kala maham tyngeh ia ka ne ka company bad ia kiwei kiwei de ki Company ba don hapoh ka thaiñ East Jaiñtia, ba ki dei ban ailad ia ki Samla ba la nang la stad ban trei kum ka lad ban ioh kam ioh jam, bad lada dang jia kum kane ka jingjia ka seng kam banse ban shim da kawei ka lad ka lynti pyrshah ia kum kine ki Company.
