Ka sorkar jylla mynta ka sngi kala pyllait ïaka pisa sha ka JHADC kaba kot T.8,00,22,467.00 , na ka bynta ban siew ïa ka tulop ba shibnai jong ki nongtrei ka Council hadien ka jingmih jingïakhih ka VPP da kaba khang tala ïa ka khyrdop jong ka JHADC.
U ma Jamshaphrang Pohtam uba dei u President ka VPP West Jaiñtia Hill ula ong kum ka seng VPP ha ryngkat ki 8 ngut ki MDC bad ki nongkitkam jong ka, kila pynlong ïa kane ka jingïakhih namar ka jingduh tulop kaba 9 bnai lynter, da kaba pynshai ruh ïa kane ka jingdawa ka seng kala dep ai da ka jingthoh sha u CEM da kaba buh por ban pyntrei haduh hynnin ka sngi 16 tarik u Nohprah.
Katba ka jingïakhih ka dang ïaibteng ula ong kaei pat kaba jia ‘ka long ba ki ophisar bad ki pulit kila dawa ïa ki ban weng noh ïa ka jingïakhih da kaba ong ba ka pisa kala poi sha ka JHADC, haba pan jingshai ïa kane hynrei kim lah ban pyni” ong u ma Pohtam.
Hynrei ha ka por jainmiet ki ophisar ka JHADC ha ryngkat u Deputy CEM ka JHADC ma Laski Rymbai ula pyntikna sha ki nongïalam ka VPP ba ka sorkar kala dep ban pynpoi mynta ka sngi ïa ka pisa kaba T.8,00,22,467.00, lyngba ka tnad Treasury jong ka Council. Kumta mardor kila weng noh ïa ka jingïakhih
Da kaba u ong nangne shakhmat ka Council kaba pynbeit ban siew noh ïa ka tulop ki nongtrei da ka system kaba thymmai kata naduh u bnai Kyllalyngkot 2026, hynrei lada kane kam urlong na ka liang ka VPP kan sa shim da kiwei pat ki lad jingïakhih kiba tyngeh.
U ma Jamshaphrang Pohtam ula ong kane ka tulop ba shibnai ka long tang kumba ai mynsiem ïa ki nongtrei ka Council ban kin ïoh pyndonkam khamtam ha une bnai Christmas bad snem thymmai.
La sakhi mynta ka sngi kiba bun na ki nongtrei ka Council kila wan ban kyrshan lang da kaba shong kyllaiñ myngngor haki lynti ïaid kjat kiba don mar pyrshah ka JHADC kum ka dak ban ai jingkyrshan ïa kane ka jingïakhih.
