Mynta ka sngi ki ar tylli ki sengbhalang ba kynthup ia ka Jaintia Student Movement (JSM) bad ka Jaintia Youth Federation (JFY) lyngba ki saw ngut ki nongialam jong ki, kila mih shakhmat ban iaid da kaba rah ryngkat ki placard naduh na Lad Kiang Nangbah College haduh DC ophis Jowai.
Ynda la poi ha DC ophis bad hadien ka jingiakren bad u DC hynrei kim ioh satia ia ka jingangnud jong ki, kumta kitei ki saw ngut kila shong kyllaiñ myngngor hapoh phyllaw u DC.
Hynrei na ka liang ki bor pyniaid District kim shah ia kitei ki dkhot sengbhalang ban shongsah hangtei, kumta la hap ban phah da ki Pulit ban pynkynriah noh bad rah ia ki sha Jowai Police Station. Wat la ki Pulit kila pyrshang ban tan ia ki, hynrei kala don ka jingiania bad ka jingpyrshah kaba jur hapdeng kitei ki saw ngut ki dkhot bad ki bor Pulit.
Kine ki saw ngut ki dei kiba la tip kyrteng kum u Jordan Rymbai President Jowai Circle JYF, samla Wellson R.D Siangshai President Eastern Region JSM, U Ribok Biam President Weatern Region Jowai Circle JSM bad u Oswald B Nampui President JYF Saipung Circle.
Hadien ka jingshah rah kitei ki saw ngut na ka liang jong ki nongialam ki ar seng kila leit ban iakren biang bad u DC ka West Jaintia Hills u ma Garod LSN Dykes ha ka ba la bthah ia ki Pulit ban pyllait pat ia ki ha ka por janmiet khlem kano kano ka jingteh kyndon.
Ka JYF bad JSM kila hap ban leh kumne ka long hadien ba ka jingbuh por jong ki ia ka sorkar na ka bynta ban pynrung klas ia ki samla bala duh rung klas kala kut noh mynta ka sngi, bad haduh mynta kitei ki 150 ngut tam ki samla pule kim pat ioh jaka ban rung klas ha kino kino ki jaka pule ne college.
Na ka liang kine ki ar seng kila pynpaw ba kane ka jingduh rung klas ki samla kala buh jingeh bha namar myna kala jan poi sa ka por ban thoh ia ki exam. Kumta kala dawa ba ka sorkar kam dei shuh ban ialehkai bad kane ka jingeh jong ki samla pule. Ha kajuh ka por ruh ki la dawa ba ka sorkar kam dei ban pynbor ia ki ban shim ia ki lyntia jingiakhih ba tyngeh.
