Ki Khlieh Nongsynshar Shnong jong ka Hima Sohra ha ka 19 tarik Nohprah 2025 ki la wan kynduh ia u Chief Executive Member (CEM) ka KHADC bad ia u EM ba dei peit ia ki Elaka haba iadei bad ka jingslem ban ai Sanad ia u Syiem ka Hima Sohra.
Haba kren sha ki lad pathai khubor u Bah Wellborn Bynnud u la ong ki Khlieh Nongsynshar shnong ki la wan kynduh ia u CEM ka KHADC namar ki paidbah ka Hima Sohra ki iakynduh shibun ki jingeh, hadien ba ki don ki shnong kiba la dep ban jied ia ki Sordar, Rangbah Shnong, ki hap ban ioh sanad sa na U Syiem bad u Syiem ka Hima Sohra um pat ioh ia ka Sanad ialade na ka Council bad kane ka buh jingeh haduh kata kata.
Nalor kata u la ong ba ki Khlieh Nongsynshar Shnong ba ki paidbah ka Hima Sohra ki don Ia ka akor ka burom bad kim kwah ban Ia lum paidbah ban wan lum Sanad hangne ha District Council bad la shim khia da ki Khlieh Nongsynshar kiba don ha ka Hima Sohra baroh kawei.
Khatduh u la ong ba ka jubab sha ki paidbah ka Hima ka Sohra ka long ba na ka liang u CEM bad EM kin shimkhia haba iadei bad ka jingai Sanad noh ia u Syiem ka Hima Sohra u Paiem Maremdor Syiem.
