Hadien ba la kut noh ka jingïakhun na ka bynta ban ioh leh niam ha krem Mawjymbuin, ka kynhun niam Hindu ki la sdang sa ban shna jaka mane blei jubor sa ha phyllaw ka District court Khliehriat ba don syndah bad ka DC office. Hynrei na ka jingïoh jingtip, bran bran ki dkhot jong ka KSU EKHDU ki la leit ban pynsangeh ia katei ka jingtrei kaba la iaid mynta. Ki shit niam Hindu ki thmu ban phah shna jubor bad rah shadien khyndiat iaka jaka mane jong ki kaba ia tyngkhuh bad ka kynroh ka District Court Khliehriat.
Na ka liang ka seng ka la ioh ban pynsgew ia u DC halor kane ka mat lyngba ka phone call bad u DC ruh ula pynpaw ka jingsngew kyndit namar khlem da ïoh ia ka jingtip.
Kum ban shu pynkynmaw ba ha ki sngi ba la leit ka seng ka la ioh ban ia kren halor kane ka mat bad na ka liang u DC u la kular kan nym don kano kano ka ban iaid sha khmat haba iadei bad katei ka jaka mane Blei bad ruh u la ong ia mynta yn pynneh iaka “Status Quo” bad u la pynpaw sha ka seng ba un ai daka order ban pynsangeh shisyndon iaka jingthmu ban tei.
Ka seng ka pynpaw ka jingkyndit ba wat haba la don kata ka Status Quo hynrei kine ki shit niam Hindu ki thmu beit ban shna jubor bad klum jubor iaka jaka sorkar (revenue land) khlem kheiñ snep iaka jingbtah ka sorkar bad khlem kheiñ snep bad khlem burom satia iaka rai ka District Administration.
Ka seng ka tip ruh lyngba ki tnat syntiat jong ka ba iakane ka mat ka file ba dei ban iaid na u myntri ba dei peit ka khlem iaid satia bad u khlem don jingtip eiei hynrei la shu ia sylla da u DC barim uba la khmih iaka Ri Bhoi District mynta bad katto katne ngut ki nonglilam bad nong pynbor ban ioh NOC na ka dorbar shnong Khliehriat Pohshnong.
Ka seng ka pynpaw ba iaka jaka sorkar lah shah thombor kumne kaba kumno pat ka jingiada kan ai sha u paidbah haba shah klum jaka ha ki nongwei.
Ka seng kan sa kynduh ha ki sngi ban wan ia u myntri ba dei peit halor kane ka mat bad ka seng ka maham ruh ba lada yn iai bteng kane ka jing leh donbor ka seng kan hap shim da ka sien jam ba tyngeh.