Ka Raij Raliang lyngba ka Raij Raliang Pastieh Committee kum ka dak ban pynneh pynsah ïa ka riti ka Dustur mynta ka sngi Thohdieng 13 tarik u Rympang kala pynlong ïa ka ‘Lehñiam Pastieh’ bad Shad Niamtre jong ka Raij Raliang, Elaka Raliang ha Madan Iaw Raliang, West Jaiñtia Hills District.
Ha kane ka sngi u Symbud Myntri Rangbah ka sorkar jylla u ma Sniawbhalang Dhar ula long u kongsan haka jingdonlang u symbud kongsan MLA ma Nijorki Sungoh, u MDC ka thaiñ ma Bisonroy Iano, ki Dolloi jong ki Elaka bapher bapher, ki Pator, ki Langdoh, ki Niaw Waheh, Ki Nongkitkam ñiam ne ki Raij, ki riewpawkhmat ka thaiñ bad ki paidbah na kylleng ki la ïadonlang.
Na ka liang u Dolloi ka Elaka Raliang ma C. Lyngdoh haba kren sha ki lad pathai khubor ula ong ïa kane ka lehñiam la leh shisien shipor da u Dolloi ka Elaka ban pyndep ïa ka kñia ïa baroh ki Blei kiba don hapoh ka shnong ka thaw bad ka Raij ban wanrah ïa ka koit ka khiah.
Shuh shuh ula pynpaw ka jingsngewkmen ha ka jinglong Dolloi jong u la 25 snem ula ïoh ban pyndep ïa kane ka Lehñiam Pastieh la ar sien mynta, kata ha u snem 2011 bad mynta u snem 2026 ïa kaba la buh ban leh 10 snem shisien.
‘Kane ka jinglehñiam ka long tang shi sngi kaba la sdang naduh ka por 7 baje mynstep, ban pyndep ka jingkñia ha ki Blai ki Syiem naduh ka Kur Lyngdoh, ka Kur Biam, ka kur Dkhar, ka Kur Lamare, ka Kur Sutnga bad ka Kur Shadap ki don ruh ki bynta kiba la hap ban kñia da ki briew jong ka Raij ha ki Blei bapher bapher’ ong u pa Dolloi.
Hadien ka jingpyndep ïa ka jingkñia kala don sa ka jingïakynduh lang ha ïung ïong Raij, nangne kila mih ban leit pynkut ha Blai Ïaw da kaba kynduh lang baroh bad la pyndep sa ka ‘niam shep’ kum ka jingsngewnguh ïa ki kñi da kaba wanrah ïa ki kpu, ki soh ki pai bad kiwei kiwei de.
U Dolloi ka Elaka Raliang ula pyntip hadien kane la don sa ka jingkhawai haki lai tylli ki Duwan kata ha ïong soh Myntang, ha ïong Kopati bad kaba kham heh ha ïong Lyngdoh Raij Raliang.
Nangta bud sa ka Shad Pastieh ba la shim bynta da u Soh Blai law bad u Langdoh Raij Raliang, Soh Kñia Pohmurang – Soh Kñia Khlieh Raliang, Soh Kñia Myntang-Soh kñia Kopati, Soh Kñia Tynshroh – Soh kñia Wah Manar, Waheh Kur Lyngdoh – Waheh Kur Biam, Waheh Kur Dkhar – Waheh Kur Suchiang, Waheh Kar Lamare – Waheh Kur Synnah, Waheh kur Khad Ar-Wasan Lamblang Raij Raliang, u Dolloi Elaka Raliang – Pator Raij Raliang. Hadein kane la don sa ka Shad Tynrai na ki Raij bapher bapher.
