–Yn wanrah da ka master plan ha ‘Pdeiñ Mukhim Tourist Sports Wahiajer’: Sniawbha–
U Symbud Myntri Rangbah ka sorkar jylla u ma Sniawbhalang Dhar ha kane ka sngi saitjaiñ ula buh mawnongrim ban tei ïa u surok Pdeiñ Mookhim, Sohphoh, Mookabeng & Kdohkule ha ka jingjngai kaba 21.255 km bad kane ka project ka kot haduh 100 klur tyngka hapoh ka State Road Fund 2024-2005 kaba kynthup ban shna lang ïa u surok 4 lane ha ki bynta na Ummulong-Nartiang.
Ha kane ka juh ka sngi la pynbna ruh ïa ki kam pynroi ban wanrah hapoh ka shnong Wahiajer, West Jaiñtia Hills District kaba la kot sha ka 2 klur tyngka kynthup ïaka Children Park hajan ka madan Stadium hapoh ka Tourism Department bad la plie paidbah ruh ïaka Ambulance naka bynta ka Multi Sports Complex Management Development Society Wahiajer.
Hashwa kane la don ka jingïalang bala pynlong ha Pdeiñ Mookhim Tourist Sports Wahiajer, ïa ka jingïalang la pynïaid da u bah M.K. Kharnaior Superintending Engineer PWD (Roads), Jowai Circle, ha ka jingdonlang u MLA ma Wailadmiki Shylla uba dei ruh u Chairman ka MUDA, u MLA ma Damanbait Lamare, ma Ngaitlang Dhar MLA barim, ki ophisar sorkar naduh u DC ka EJH, ki SP na West bad East Jaiñtia nalor kiwei kiwei de.
U synbud myntri rangbah ma Sniawbhalang Dhar ha ka jingkren ula pynsngew ïa ki kam pynroi kiba ula wanrah hapoh ka Constituency kumjuh hapoh ka Jaiñtia Hills bad haka jylla hi baroh kawei. U la ong kum u MLA ula la jop haduh 4 sien, nyngkong ula pylleit jingmut ban pynbha pynmiat shwa ïa ki surok kiba pynïasoh ïa ka Constituency, nangta sa ka Block, ka Police Station Nartiang bad ka Complex ha Wahiajer ban kyntiew ïa ki samla ïalehkai.
Ula pyntip ruh hapoh 90 tylli ki shnong ka 1-Nartiang Constituency ka dei kaba nyngkong ban ïoh haduh 170 klur ban pynpoi ïaka umbam umdih, nangta sa ka Tourism Complex hajan ka pung Thadlaskeiñ.
Ha kane ka sngi u kongsan ula plie paidbah ïa ka ML72 Rising Society ha Pdeiñ Mookhim Tourist Sports Wahiajer West Jaiñtia Hills District ïa kaba u symbud myntri ula kular ban leh da ka Master Plant ïa katei ka jaka ‘Pdeiñ Mookhim Tourist Sports Wahiajer’ ban khring ïa ki nanwan jngohkai pyrthei. Da kaba u ong ka jingwan poi ki nongwan shangkai pyrthei sha ka jylla kan ïarap shibun ban pynkiew ïa ka ïohkam ïohkam.
Haka juh ka por ula kyntu ïa ki nongkitkam ka ML72 Rising Society ba kin treibha ïa ka kam ban kyntiew shuh shuh ïa ki samla kiba don ka sap ka phong bad ïa ki kynhun treimon sngewbha ha ki liang baroh.
Kiwei de kiba ai jingkren ki kynthup ia u MLA ma Wailadmiki Shylla, u ma D. Langstang Chief Engineer PWD (roads) Shillong, u M. Marbaniang Superintending Engineer Tourism Department, u Waheh Shnong Wahiajer ma S. Laloo, ma K. Shylla President ML72 Rising Society, katba ïa ki kyntien ai khublei la ïoh na u ma H. Nengnong EE PWD.