Ka Assam ka la long ka jylla kaba ioh ban rah ia ka nam lahduh lane ka overall champions ha ka iakob siat suloi jong ka 2nd North East Olympic Games 2022, hadien ba ka la ioh ban khur haduh 11 tylli ki takma ksiar na ki 18 tylli ki takma ksiar ba sam ha katei ka sngi.
Ia katei ka lympung iakob siat la pynlong ha ka Indoor bad Outdoor shooting range jong ka Assam Regimental Centre kaba la pynkut artad hynne ka sngi (15/11/2022).
Nalor ki 11 tylli ki takma ksiar, ka Assam ka la ioh ruh ban khur 4 tylli ki takma rupa bad 4 tylli ki takma rnong. Ka Manipur pat ka la ioh ban wan ha ka kyrdan kaba ar da ki 4 tylli ki takma ksiar, 8 tylli ki takma rupa bad 5 tylli ki takma rnong bud pat sa ka Meghalaya kaba khur lai tylli ki takma ksiar, 4 tylli ki rupa bad 5 tylli ki takma rnong.
Ka Mizoram pat ka la ioh ban khur tang ar tylli ki takma rupa bad saw tylli ki rnong katba ka Arunachal Pradesh pat ka khlem ioh khur takma satia katba ka Sikkim, Tripura bad Nagaland pat ki khlem sei kyrtong ha katei ka lympung.
Man ka kynhun ki phah haduh 16 ngut ki nongsiat suloi lait noh ka Arunachal Pradesh kaba phah tang 11 ngut.
Ia ki lai tylli ki takma ksiar jong ka Meghalaya ha katei ka sngi la ioh ban khur da u Dennyson Kyrsian ha ka 50m Rifle Prone Men’s Individual category. Katba ka kynhun jong u Kyrsian, Banrilang Bleine bad Rajdeep Ghosh ki la khur takma ha ka iakob siat 50m Rifle Prone Men’s Team katba ka Anjali Singh, Veronica Buhroy bad Amalisha N Sangma ki la khur takma ha ka thup 50m Rifle Prone Women’s Team Championship.
