Ka ophis jong u Deputy Commissioner, West Jaiñtia Hills ryngkat ka jingïatreilang bad ki district bapher bapher, ki la pynlong ïa ka “Buyer-Seller Meet’ kaba sdang naduh ka 5 bad kut haduh 7 tarik December, 2024. Ia kane ka ïew iadie iathied la pynlong ha madan Jrisalein Chuwakhu, Jowai.
Ïa kane ka “Buyer-Seller Meet’ne ka ïew iadie iathied la plie paidbah da u MLA ka Jowai uba dei ruh u Chairman ka MUDA, u ma Wailadmiki Shylla, haba kren u la ong ba ka thong jong kane ka jingpynlong ia kum kane ka ïew iadie iathied, ka long ban kyntiew ïa ki mar rep kiba mih na la ka jong ka thaiñ bad ki mar shna hi ne ki jingri jingdup kiba ki briew jong ka ka thaiñ ki la leh hi da lade bad ka long ruh kawei na ki lad ban pyni ia ka ruh sha ki samla ha ka jingiadei bad ka lad ai kam ai jam ïa ki samla da kaba ieng hi ha la ki jong ki kjat. U la pynshlur ia ki nongrep ban iasam jingmut bad kyntu ia ki samla ba kin wad ia ki skhim sorkar na ka bynta ban seng kam seng jam.
U Deputy Commissioner u BS Sohliya, IAS u la pynpaw ia ka jingthmu jong kane “Buyer-Seller Meet’ne ka ïew iadie iathied, ka long ban kyntiew ia ka jingiatreilang hapdeng ki nongrep bad ban pynbha shuh shuh ia ka jingpynmih mar ka jong ki. U la kyntu ruh ban pyndonkam da ki pla kiba kiba ym ktah ia ka mariang ha ka jaka ki plastic.
Ha kane ka jingïalang la don haduh kumba 120 tylli ki stall kiba pyni ïa ki mar rep, ki kam shna jingshna, ki kam ri jingri bad kiwei kiba wan na kane hi thaiñ.
Ha kane ka sngi plie ia kane ka “Buyer-Seller Meet’ne ka ïew iadie iathied, la sam ïa ki syrnot bad ki tiar treikam sha ki nongshah hikai hapoh ka Meghalaya State Skill Development Society (MSSDS).
