U myntri ka tnad pule puthi jong ka sorkar jylla u Rakkam A Sangma mynta ka sngi Palei ula wan ha Thomas Jones Synod College, Jowai shi bynta na ka prokram leh burom halor ka jingithuh jong ka sorkar jylla ïa kane ka College kum kawei na ki jaka pule hapoh ka People’s College Grant in aid Scheme.
Ïa ka jingïalang ha kane ka sngi la pynïaid da u Rev. Meshak Shylla uba dei u Chairman Governing Body TJSC, ha ka jingdonlang u symbud kongsan ma Wailadmiki Shylla (MLA), bah M.H. Shangpliang uba dei Adviser ka sorkar jylla haka pule puthi, ka Principal jong ka College Dr. I Dkhar, u Moderator KJP Synod Mihngi Rev. C.L. Laloo, u Deputy Commissioner ka WJHD bah B.S. Sohliya, Ka DSEO kong A. Syiem, nalor ki nonghikai (Lecturer) bad ki samla pule jong ka College.
Ka Principal jong ka College ka Dr. I Dkhar kala pynsngew ïa ka jingïaid lynti jong ka College naduh ba sdang jong u 1997 kaba don ïa ka moto “Tip briew tip blei”, kala pynsngew lyngba ka jingïarap ka KJP Synod Mihngi kum ka (sponsoring body), kumjuh naduh u Myntri Rangbah ka jylla, ki Myntri Sorkar, u MLA ka thaiñ kala nang ai mynsiem shuh shuh ïa ka College ban jam shakhmat haka jingai jingnang jingstad ïa ki samla pule ha ki liang baroh, kala pyntip ruh ba ka College mynta kala don ha ki lai tylli ki streams kata ka Arts, Science bad Commerce.
Na ka liang u Rakkam A Sangma haba kren kum u kongsan ula ai ka jingïaroh ïa ki nongseng ïa kane ka College, ïa kiba la ai ha ka kyrteng u kpa jong ka Dak thoh Khasi u Rev. Thomas Jones uba dei u Missionary na ka Ri Wales.
Shuh shuh ula pynsngew na ka liang ka sorkar ka don ïaka thong kaba hakhmat eh ban kyntiew ïa ka pule ka puthi hapoh ka jylla, kumta da ka jingtrei shitom jong u Myntri Rangbah u Conrad K. Sangma la dep ban pynrung ïaki 21 tylli ki College ha kylleng ka jylla ban ithuh ïaki hapoh People’s College Grant in aid Scheme.
Kumta ula kyntu ïa ki nonghikai (Lecturer) ba kin ai ka jingshakri kaba bha tam ïa ki samla pule, khnang ba ka jylla kan kiew shaphrang ha ka liang ka pule puthi hapeng ki jingkylla jong ka por, ula pyntip ruh shen ba ka sorkar kan plie ïa ka DIED Institute ha Sohra ha ka jingtei kaba 6 klur tyngka.
U ma Wailadmiki Shylla ula ong lyngba ka jingkloi u Myntri jong ka tnad pule puthi la lah ban wanrah ïa ka jingkylla ha ka rukom ai jinghikai, ula pynsngew ruh ba ka sorkar kala wanrah ïa ki skim bapher bapher ban pynbha shuh shuh ïa ka puli puthi hapoh ka West Jaiñtia Hill. Kiwei de kiba ai jingkren ki kynthup ïa u bah M.H. Shangpliang Adviser ka sorkar jylla haka pule puthi, u Rev. C.L. Laloo bad u W.E.H Lamin Vice Principal.
Ha kane ka sngi la sam ruh ïa ki syrnod ban ithuh ïa ki 23 ki nonghikai (Lecturer) bad kawei (1) ka Librarian hapoh ka People’s College Grant in aid Scheme. Ka College kala ai khusnam ruh ïa ki 6 ngut ki nonghikai kiba la pyndep ïa ka kyrdan Ph.D ha ki phang bapher bapher.
La pynphuh pynphieng shuh shuh ïa kane ka sngi da ki jingrwai bad ki jingshad tynrai ba la shim bynta da ki samla pule jong ka College. Katba ïa ki kyntien ai khublei ïa ïoh na u H.K. Nongpluh, Asst. Professor TJSC.