Wat hadien ba iai bteng ki seng bapher bapher ban kynra ia ki bar jylla bad ban iai peit pyrman halor ka jingrung kyrthep ki mynder ki bym don ia ki kot ki sla ba biang lane ki bym ioh ia ka jingtip ba tikna halor ka jinglong trai shnong jong ki, la i kumba ka jingrung laitlan ki briew kiba thmu ban wan buhai shnong ha kane ka jylla ka la nang kiew hynrei namar ka jingdon ki seng ki bapher bapher kiba angnud ia ka jingbha jong ka lawei ka don ka jingiada. Ha kaba iadei bad kane ka khubor, ki dkhot ka Hynñiewtrep Youth Council (HYC) Ribhoi District ki la ioh ban bat haduh 57ngut ki briew kiba kiba la suba jur ba ki dei na ri Bangladesh kiba lah wan lyngba ka jylla West Bengal sha kane ka Jylla.
Hadien ba lap ia kitei ki briew na Lad Umroi kiba lah wan da ka Bus kaba don ia u Registration No. WB 87 0642, ki dkhot ka Seng HYC ki lah kylli pyrthuh ia ki kot ki sla bad ka leit ka wan ka jong ki. Ha kaba sdang kine ki briew ki pyni ia ki Passport bad ki Visa ki jong ki bad ong ruh ba ki thmu ban leit sha Silchar, Assam bad don ruh kiba ong ba ki thmu ban wan sha Shillong bad leit shangkai sha Sohra. Hynrei haba kylli pat ia ka jaka ba ki thmu ban shong ban sah miet kine ki briew kim shym la ai ka jubab kaba shai.
Hadien ka jingbymshai ka jubab na kine ki briew, ki dkhot ka Seng HYC ki la iathuh ba ki la aiti noh ia kitei ki briew sha ki pulit jong ka Umiam Police Station khnang ba kin ioh ban tohkit bad ba kin leh katkum ka aiñ. Ki dkhot ka Seng ki lah pyntip ia kane sha ki Nongialam ka CEC kiba lah pyntip pat ia kane ka kam sha ki bor ba halor.
Hadien katto katne kynta bad hadien ba lah peit ia ki kot ki sla, ki Pulit ki lah pyllait noh ia kitei ki briew baroh bad pyntip ruh sha ka Seng HYC ba kine ki briew kin leit Sha Silchar, Assam.
Ha ka jingiathuh kaba bniah jong uwei na ki dkhot ka Seng, la ong ruh ba ki la ap bad bud-dien ia kitei ki briew hynrei la lap ba ka kali ba kit ia ki kam shym la iaid sha Bypass ban leit sha Silchar lyngba ka Mawryngkneng-Jowai ter ter hynrei ka lah hiar pynban sha ka lynti ban leit phai sha Guwahati. Ki Dkhot ki la pynlong ka jingap miet namar kane ka jingleh jong ki ka la pynsuba jur ia ka jingthmu jong kine ki briew.
Dang step phyrngap, ki dkhot ka Seng HYC la ioh ia ka jingtip na ki Paidbah ba kine ki briew ki lah wanphai biang sha Lad Umroi bad nangne ki lah kiew pat ha ki kali sumo jong ki trai Jylla bad ki lah leit Sha thaiñ Sohra. Khlem da pynslem, ki dkhot ka Seng ki la pynlong ia ka jingwad jingtip ba mar mar la ioh ruh ia ki Number kali jong ki Sumo kiba lah kit ia ki sha Sohra bad pynlong ka jingpeit pyrman ia ka iaid ka ieng jong kine ki briew.
Na ka liang ki Nongialam ka CEC ki lah pyntip ruh sha ki bor pulit ka Distrik bad Sohra Sub-Division ban buddien ia kine ki briew khnang ban pyntikna ba ym dei uwei ruh na kine ki 57 ngut ban iohlad ban shong ban sah beaiñ ha kane kane ka jylla.
Ki nongialam ka HYC ki la kyntu ruh ia ka Sorkar ba kan bthah ia ki jaka ap phira ha kylleng ka Jylla khamtam ha ki khappud bad ia ki bor pulit ba kin phikir bha ia ka jingrung jingmih jong ki briew khamtam eh na Bangladesh ha kum kane ka por.