Haduh kumba 700 ngut ki khynnah skul, ki la wan ban iashim bynta ha ka Career Guidance Seminar, kaba la pynlong da ka Office jong u Deputy Commissioner, West Jaintia Hills ha ka jingïatreilang bad ka SPM IAS Academy, Guwahati. Ia kane ka Seminar la pynlong ha District Library Auditorium, Jowai.
Ka thong jong kane ka prokram ka long ban ai mynsiem bad ban pynshlur ïa ki samla pule ban peit bniah ïa ki lad ki lynti ia la ka lawei. U MLA jong ka Jowai uba long ruh u Chairman ka MUDA, ma Wailadmiki Shylla, u Deputy Commissioner Abhinav Kumar Singh, u Superintendent of Police Jaspal Singh Dhanoa, u District & Sessions Judge N. A. Khan bad kiwei ki heh sorkar ki la ïa donlang ha kane ka prokram.
U DC A. K. Singh, haba kren, u la kyntu ïa ki samla ba kin shim kabu na ki jingtip kiba la pynpaw ha kane ka seminar, katba u ma Wailad, u la kdew halor ka jingïar ka jingbym donkam jong ki samla pule kiba la nang la stad bad ka jingdonkam ban jied ïa ka lynti kaba biang katkum ka bor bad sap jong ki. U la ai ruh ïa ka cheque kaba T. 1 lak tyngka sha u nongrwai ba paw ka nongbah Jowai, u Deiwitawan Synnah kum ka jingnoh synniang jong u ha ka kam rwai.
U Judge N. A. Khan u la kdew ba ka pule puthi ka dei ban wanrah ka jingsngewthuh, da kaba kdew nuksa ïa ka jingtrei shitom jong u Dr. A. P. J. Abdul Kalam bad u la pyni ruh ba ka aiñ ka long kawei na ki kam kaba khraw ha ka lawei. U SP Dhanoa pat u la pynshai ïa ka jingïapher hapdeng ka “job” bad ka “career”, bad u la kyntu ïa ki samla ban wad ïa ka jingsngew iadei ne kaba ki sngew tynnad ha ka jingim jong ki.
Ia kane ka seminar la lam khmat da u Hridesh Kumar Shrotriya bad ka kynhun jong u na ka SPM IAS Academy, kiba la ai shi bun ki jinghikai sha ki samla pule kiba poi sha kane ka Seminar.
