U myntri ka sorkar kmie ba dei peit ïa ka tnad Agriculture & farmer Welfare and Rural Development u Shivraj Singh Chauhan ula pyntip ïa ka prokram kaba la tip kum ka ‘Krishi Sankalp Abhiyan’ ryngkat ka jingïatreilang bad ka tnad Indian Council of Agriculture Research (ICAR) kan sdang naduh u bnai Jymmang 29 tarik bad kan bteng haduh 12 tarik u Jylliew ha ki 700 tylli ki District jong ka Ri.
Hapoh kine ki sngi jong ka prokram ki riewstad (Scientists) ba kynthup ïa ki ophisar bad ki nongtrei na ka tnad ka rep ka riang ki leit mih sha manla ki shnong jong kitei ki District ban ïoh ïathir markhmat bad ki nongrep ha ryngkat ki lad jingbatai khambniah.
Ïa kane ka rukom ai jinghikai la bthah da u Myntri Rangbah duh ka Ri u Narendra Modi kum ka lad ban pynbha ïaka rep ka riang katkum ki lad jingtip kiba thymmai, na ka bynta ban pynlong ïa kawei ka ri, kawei ka kam rep bad kawei ka kynhun.
Utei u myntri sorkar ula dep khot pynlong ïa ka jingïalang jong ka kynhun High-Level ha nongbah Delhi bad haduh 731 tylli ki Krishi Vigyan Kendra (KVKs) na kylleng ka Ri bad 100 tylli ki ICAR Institutes bad ki Senior Officials kila wan ban ïa shim bynta ha kane ka jingïalang.
Shuh shuh u Shivraj Singh ula ong kane ka prokram ka long shi bynta ban pynsngewthuh ïa ki nongrep halor ki jingmyntoi kiba lah ban ïoh na kane ka prokram kynthup ïa ki skim bapher bapher jong ka sorkar kmie.
La pynbeit kin don haduh saw ngut ki Scientists manla ka kynhun ki ban leit pynsngewthuh ïa ki nongrep halor ka rukom pyndonkam ïa ki dawai (fertilizer) ban thung jingthung na ka bynta ka jingbha ka khyndew. Kumjuh ruh ka jingpyndonkam ïa ki Drone haka rep ka riang ki ban ai jinghikai da ki briew ka KVKs, ICAR bad IFFCO bad kiwei de.
La ïathuh ba kane ka kam ka long shi bynta ban pynkiew ïa ka rep ka riang hapoh ka ri bad kane ka ïarap ïa ka lashai ban wan hadien ka 10-20 snem.
Na ka liang u Shivraj Singh ula phah shithi ruh sha baroh ki Myntri Rangbah jong ki jylla hapoh ka Ri, nalor sha u Union Agriculture Secretary u Devest Chaturvedi bad u ICAR Director General i Dr. M.L Jat ban pynkhreh shait shait ïa kane ka prokram.
