Kum shi bynta ban pynshlur ia ki rang bad thei ialehkai jong ka jylla na ka liang u Myntri Rangbah ka jylla u Conrad K Sangma haba kren lyngba ka video mynta ka sngi na ka bynta ka jingpynkhreh ia ka 2nd North East Olympic Games 2022, u la ong ba na ka liang ka sorkar jylla ka mang haduh 75 lak tyngka ban ai sha kito ki rang bad thei ialehkai ka jylla kiba lah ban wanrah ia ka takma ksiar ha ka Olympic ka ban sa long ha u snem 2032. Katba na ka bynta kane ka jingiakhun (NEOG) jong ki jylla ka thaiñ Shatei lam mihngi kiba lah ban wanrah takma ksiar kin ioh da ki phew phew hajar tyngka.
U Myntri Rangbah ula ong ruh ba ka sorkar ka don ka jingangnud bad ka thong ban thaw ki lad ki lynti ia ki nongialehkai ka jylla ba kin ioh ban poi sha ka thong ban ioh rung sha ka Olympic Games bad u don jingkyrmen ba lyngba ki jingtrei shitom jong ka sorkar bad ki nongialehkai ka jylla yn sa lah ban pynurlong ia kane.
Ka Jylla Meghalaya kan sa pdiang ban pynlong ia ka 2nd North East Olympic Games 2022 mynta u bnai. Baroh ki jingpynkhreh kila long kiba iaid beit iaid ryntih la ong shuh shuh u Myntri Rangbah.
Ha kane ka lympung kin don haduh 2000 tam ki nongialehkai na ki jylla bapher bapher jong ka thaiñ shatei lammihngi ki bn iashim bynta ha ki jait jingialehkai bapher bapher kiba don haduh 18 jait.
Mynta ka sngi na ka liang jong u Co-Chairman ka NEOG 2022 bad u Commissioner and Secretary to the State Government u Dr. Vijay Kumar D IAS ula leit ban jurip ia ki jaka ban pynlong ia kane ka lympung kiba don ha Greater Shillong, ha ka jingiasynran lang u Secretary to the Government, u bah Cyril VD Diengdoh IAS, u Director of Sports and Youth Affairs, Shri Shivansh Awasthi IAS.
Kala don ruh ka jingpynbha shuh shuh ia ki jaka ialekai kum ka MFA Turf kaba don hah Madan Polo, ha kaba la buh ia ki Floodlights bad ki Temporary Stand na ka bynta ka jingialehkai Football.