U bah D.P. Wahlang, Additional Chief Secretary ka Sorkar Jylla ula ai ka jingiaroh ia ki tnat sorkar bapher bapher ba kynthup ia ka Health Departmentm ka Education Department bad ka Sambandh Health Foundation bad khamtam ia ki 8400 tylli ki skul hapoh ka jylla kiba la kloi ban iashim bynta ban ai ka jingpynsngewthuh sha ki nongshong shnong ka jylla halor ka jingsniew kaba mih na ka jingpyndonkam ia u Duma.
Ia kane u bah Wahlang ula kren ha ka jingialang pynkut ia ka prokram World No Tobacco Day mynta ka sngi ha State Convention Centre, Shillong. Ka phang jong kane ka prokram ka long “Tobacco – Threat to our Environment” lane “U Duma u buh jingma ia ka mei Mariang”. Ia ka prokram la pynlong da ka National Health Mission, Meghalaya ha ka jingiatreilang bad ka Education Department, Meghalaya kumjuh bad ka Samagra Shiksha.
Shuh shuh haba kren kum u kongsan u bah Wahlang ula pynkynmaw ia baroh halor ka jingktah kaba mih na u duma ba pynmih tdem bad u bym pynmih tdem ruh baroh ar ki don ka jingktah kaba jur ia ka mariang bad ia ka jingkoit jingkhiah. U buh ruh ka jingkyntu ia ki khynnah skul ba kim dei ban ngop ha ka jingpyndonkam ia u duma bad kyntu ia ki ban long ki nongrahktien pyrshah ia u duma da kaba sdang nala ïing, na skul bad ha ka imlang ka sahlang.
U Ram Kumar. S, Additional Secretary, Health and Family Welfare Department and Mission Director, National Health Mission, Meghalaya ula kdew ia ki jingshisha ba ka jylla Meghalaya ka dei ka nongbah jong ka jingpang Cancer hapoh ka ri India kaba paw katkum ka report sorkar. Kumta u ong ka long kaba donkam bha ban shim ia ka jingkhmih bnia ba dangkloi da kaba pynkylla ia ka rukom im jong ki briew. Ula ong ruh ba ka jingshim bynta jong ki khynnah skul naduh ki District haduh ki Block ka iarap haduh katta katta ban long ka nuksa ban wanrah ka jingpynsngewthuh halor ka jingktah jong u duma ha ka koit ka khiah, ka imlang sahlang bad ia ka mei mariang. Ula pynpaw ruh ka jingsngewnguh ia ki Nongialam Shnong, ki long kmie long kpa, ki MLA bad ki nongialam niam kiba la don bynta ban kyrshan ia kane ka prokram. U ong ba lada ia kum kine ki prokram lah ban pynlong man la ka 6 bnai, khmih lynti kan sa don ka jingkylla ha ka jingmlien jong ki nongshong shnong halor u duma. Ula khublei kyrpang ruh ia ka Police Department kaba la don bynta ha kane ka phang.
La ioh ia ka jingai jinghikai halor ka World No Tobacco Day da i Dr. Lana E Lyngdoh Nongbri, Sr. Dental Surgeon, SNO, National Tobacco Control Programme.
Hynne ka sngi la sam ruh ia ki khusnam sha ki skul kiba la jop ha ka jingiaid Rally bad ka Signature Campaign bad ruh la leh burom ia ki nongtrei jong ka tnad Education Department kiba la shim khia ban pyntreikam ia ka phang Tobacco Free Education Institution (ToFEI). (MIPR)
