Ki saw tylli ki sengbhalang kiba kynthup ïaka East Jaiñtia National Council (EJNC), Jaiñtia Student Movement (JSM), Hynñiewtrep Youth Council (HYC) bad ka Hynñiewtrep Achik National Movement (HANM) ryngkat kiwei de ki seng kiba la wan ïasohlang ha ka jingïaid rally kaba la sdang na madan Mihmyntdu bad ïaid shaduh sha Iawmusiang ha stand Ummulong hajan ka Jowai Police Station.
Ha kane ka rally la wan ban ïashim bynta da ki spah ngut ki Dkhot Sengbhalang da kaba rahlang ïa ki lama bad ki jingpyrta pynrem jur ïa ka sorkar MDA. La pynlong ïa kane ka rally halor ka Nongrim ban pynbor ïaka Sorkar MDA ban pynurlong noh ïa ki 9 tylli ki mat jingdawa jong ki 5 seng kiba hap hapoh ka ‘Save Hynñiewtrep Mission’.
Kine ki 9 tylli ki mat ki long halor ka jingdawa pyntreikam noh mardor ïa ka Inner Line Permit (ILP) hapoh ka jylla, ban pynrung ïa ka Ktien Khasi hapoh ka kyrnit kaba Phra ka Riti synshar ka Ri India, ban pynbeit ïa biang MoU ba la dep ïasoi hapdeng ki ar jylla, ban pynkynrieh mardor ïa ki khar mator ba shong beaiñ ha ïew mawlong, ban pynbeit thymmai ïa ka policy thungkam hapoh ka jylla kaba noh shilliang, ka thohkit da ka CBI ha kaba ïadei bad ka kam bamsap hapoh ka jylla, ban tohkit da ka CBI bad pynshitom ïa kiba donkti siat ïap ïa u Cheristerfield Thangkhiew, ban thung kam noh mardor da ka lynti ba dei ïa baroh ki kam ba dangsah hapoh ka jylla bad kaba khadduh ban dawa weng nong ïa ka jingwanrah ïa ka jingkhalai Casino hapoh ka jylla
Ïa ka jingïalang la pynïaid da u Jimmy Paul Kharmuli na ka JSM, naka liang u samla Sambormi Lyngdoh President ka EJNC- CEC haba ai jingkren ula ong ba kane ka sorkar kala lehbeiñ ïa ka Ri-Lum Jaiñtia da kaba ong wat ïa ka ïew baheh bad kaba rim tam ha Jowai ka Iawmusiang ka dang shateng haduh mynta khlem pat pyndep ïa ka jingpyntrei. Ula ong lada kane ka ïew ka don ha Garo Hills la tikna kane ka ïew la pyndep nadong shadong.
U ong lada ïa nujor bad ka Garo ka Ri-Lum Jaiñtia ka long kaba shadien shaba palat ha baroh ki liang nalor ba kadei ka District kaba pynmih shibun ka khajna na ki mar poh kyndew.
Hynrei lada phai sha ka jingkyrduh kam kyrduh jam ki khun samla kane ka dei na ka daw ka jingduna bad ka jingtlod jong ka District Council ban pyntrei kam ïa ki kyndon aiñ ban tehlakam ïa ki bar jylla ban wan shapoh ka Ri Khasi Jaiñtia.
Lada peit ka jingwan ki bar jylla shapoh kane ka Rilum Jaiñtai kum sha ki jaka ba don ki ‘Cement Plant’ kila dap satang da ki bar jylla bad kane kala dawa shishi ïa ka jaitbynriew ban don noh ïa ka ILP.
Kaba sngewsih ïa ka Rilum Jaiñntai ka long nalor ba bun ngut ki Minister kiba don ha kane ka sorkar hynrei kila dap pynban sa tang ki jingkular ban wanrah ïa ki kam pynroi da ka pynsngew ïa kita ki smart town bad smart city hynrei lada peit sha ki kyndong kynshrot ki dap satang da ki niut ki ner.
Ula pynkynmaw ruh wat ïa ka jingtohkit halor ka jingshah siat ïap jong u bah Cheristerfield Thangkhiew hynrei ka sorkar haduh mynta kam pat pynpaw pyrthei da kaba tikna, da kaba u kren shai lada ngi dang suki kane ka sorkar kan leit ban siat ïap kumjuh ïa kiwei de. Wat ïa ki ar ngut kiba la shah siat ïap ha Mukhep East Jaiñtia Hills haduh mynta kim pat ïoh ïa ka jingbishar ba hok ong utei u President ka EJNC.
u Robert June Kharjahrin na ka HYC ula kynthoh jur ïa ka rukom treikam jong kane ka sorkar kaba la pynbeit ïa ki paidbah tang da kaba sam ïa ki khunsniang, ula ong ba ka sngewsih mynta ba ka jingkyrduh kam jong ki khun samla Khasi Jaiñtia namar ka jingpyntreikam ai ka Reservation Policy bad ki jaitbynriew Garo.
Kiwei de kiba ai jingkren ki kynthup na ki nongïalam ka Sur ka Bri u Hynñiewtrep, na u Bandari Ryntathiang, u Leningstar Rymbai na ka JSM nalor kiwei de. La pynbna ba ka jingïaid rally kaba bun kan long ha Ribhoi District ha 21 tarik Naiwieng la kyrpad ïa ki Seng Bhalang kiba la don bynta mynta ka sngi ha Jowai kin wan ban ïadonlang ha katei ka Rally.
