Ka kynhun Pulit jong ka Ummulong Beat House kiba dang pynlong ia ka jingtalasi kali kumba ju leh ha ki bynta jong ka Mookyndur Check Point kila ioh bat ia kawei ka trok mynta ha ka por shiteng synnia kaba don ia u Registration Number RJ.10 GB 1424 kaba wan na liang Jowai.
Katkum ka khubor Pulit bala phah da u Superintendent of Police ka West Jaiñtia Hills District u Bikram D. Marak ula ong, haba ki Pulit kila pynsangeh ia kane ka trok ha ka por kumba 1:30 AM, na ka liang jong nongniah um shym la sangeh mar mar hynrei ula iaid kham sha pajih ka jaka Check point bad sangeh hangta. Mar hangta hi ki Pulit kila iohi ba ki don ar ngut ki briew kiba la hiar na katei ka trok bad phet rieh ha ka jingdum jong ka miet.
Haba ki Pulit kila poi hajan kila kiew hapoh katei ka trok, hynrei u nongniah bad u nongbud kim don shuh hapoh kali. Ha kum kata ka por ki Pulit kila sngew ia ka jingsma Kanja (Bhang) kaba mih na katei ka trok. Kumta mar mar ki Pulit kila ai jingtip sha ka kynhun ANTF bad ha ka jingkhynra ha ryngkat ki nongsakhi, ki Pulit kila ioh ban sei haduh 80 tylli ki song kiba la song bha hapoh ki syndok-kot.
Haba la thew ia kine ki Kanja kila kot ka jingkhia haduh 1168.182 kgs bad haba la kheiñ ia ka dor iew jong ki ka poi haduh T.3.5 klur tyngka.
Ha kaba iadei bad kane la register ia ka case ha Jowai Police Station kat kum ka kyndon C/No. 92(07)22 U/S 21(c)/ 60(3) NDPS Act bad ka jingtohkit ban ioh kem ia kiba donkti ka dang iaid shakhmat.
Na ka liang jong u DGP ka jylla ula pynpaw ka jingiaroh ia ka kynhun Pulit kaba la lah ban ioh kurup ia une u Kanja haduh shi Ton tam. Ula ong ba un sa ai khusnam ia kito ki Pulit kiba don duty ha kane ka miet.
