Ka sorkar Meghalaya kum shi bynta na ka jingiakhun ban kyntiew ia ki thaiñ nongkyndong mynta ka sngi la sam ia ki jingiarap ha kylleng ki bynta jong ka jylla kaba la kot shaduh 23,491 ngut ki nongioh bynta kiba dei ki nongrep bad kane ka long ka jingsam jingiarap kaba ar na ki jingheh hapoh ka jylla ia kaba la lah ban pynioh jingiarap beit beit sha ki nongioh bynta.
Ha kaba iadei bad kane na ka liang jong u Myntri Rangbah ka jylla u Conrad K Sangma ruh ula ioh ban sam ia kine ki jingiarap kaba kot sha ka T.1.41 klur tyngka hapoh ka FOCUS+ kaba dei ka Farmer’s Welfare Programme jong ka sorkar jylla. Kane ka jingiarap ka leit sha ki 2,822 ki nongioh bynta kiba don ha Batabari, Rajabala Division ha West Garo Hills.
Ka FOCUS+ ka dei ka skhim sorkar kaba lah ban pynioh jingmyntoi ia kino kino ki nongrep ha ki liang bapher bapher jong ka jylla. Kane ka dei ka skhim kaba la pyniar shuh shuh ia ka skhim ba rim ka FOCUS. Ka jingtreikam kine ki ar tylli ki skhim (FOCUS bad ka FOCUS+) kala lah ban pynioh jingmyntoi ia ka long iing jong ki nongrep mar T.10,000/- (Shiphew hajar) tyngka.
Kumban shu pyntip ba lyngba kane ka skhim FOCUS+ la lah ban phah ia ka pisa haduh T.11.75 klur tyngka sha ki 23,491 ngut ki nongioh bynta hapoh ka jylla.
Shuh shuh lyngba ka skhim Rural Backyard Piggery, ‘PROGRESS’ ka sorkar kala ioh ban sam 1200 tylli ki sniang symbai (3 ki kynthei bad 1 u shynrang) sha ki 300 ngut ki nongrep hapoh West Garo Hills District. Kumjuh ia ki symbai syiar Kuroiler la sam sha ki 100 ngut ki nongioh jingmyntoi. Lyngba ka skhim ‘PROGRESS’ ka sorkar kala mang ban pynioh jingmyntoi sha ki 10,000 ngut ki nongrep ne nongri mrad hapoh ka jylla.
U Myntri Rangbah ula ong shuh shuh “Ngi kmen ban ioh pyntrei ia kane ka skhim na ka bynta ka jingmyntoi jong ki nongrep, ki Selh Help Group bad ki Village Organisation. Ka sorkar jong ngi kala trei khlem shongthait ban kyntiew ia ka ioh ka kot jong ki nongrep ha kylleng ki bynta jong ka jylla. Ka jingthmu jong ng ka long ban kyntiew ar shah ia ka jingiohnong da kaba pynbiang ia jingdonkam jong ki. Hapoh kine ki saw snem shiteng ka sorkar jong ngi kala long ka lahduh ha kiba bun ki prokram bad ki lyngkha trei kiba lah ban wanrah ka jingiohnong ia ki nongshong shnong ka jylla”.