-Ka Sorkar kan siew tulop ne em ia ki MDC ruh???-
Tang hadien shi sngi ba u Myntri Rangbah ka Jylla Conrad K. Sangma u la pynbna paidbah ba ka Sorkar Jylla ka la rai ban siew hi noh ia ka Tulop na ka bynta 3 tylli ki District Council kiba don ha kane ka jylla, hynne ka sngi ka 26 Nailar 2025, u Bah Roykupar Synrem – President Hynniewtrep Youth Council (HYC) Central Body, u la mih shakhmat ryngkat bad ka Seng ban buh jingkylli ia u Myntri Rangbah bad ia ka Sorkar halor katei ka rai ka ban treikam naduh 1 Naiwieng 2025.
“Ha shwa ba ngin ong ba ngin kyrshan ne pyrshah ia kane ka rai jong ka Sorkar, ngi hap ban sngewthuh ba kaei ka ban ktah ia ki District Council, ia ka synshar ka khyndew ka shyiap jong ngi. Ngi kwah jingshai na ka Sorkar ba haei la thoh hapoh ka 6th Schedule lane hapoh ka Riti Synshar hapoh jong ka Ri India, ba ka Sorkar kan siew tulop ia ki District Council. Katkum ka jingsngewthuh jong ngi na ka 6th Schedule, ka District Council kan don hi la ka jong ka Phon (fund) bad na kata ka phon, kan pyntyllun ia ki kam” ong u Bah Roykupar.
Shuh shuh u la ong ba lada ka Sorkar ka la rai ban siew hi ia ka tulop haei kan don kata ka jinglong laitluid namar ki nongtrei ka Council kin hap ban pyndem ha kita kiba siew tulop ia ki ym shuh ia ka jingpyniaid jong ka Council.
“Ngi iohi ia ka jingkren jong u Myntri Rangbah ba u ong ba kin ym ktah ia ki kam ba ka District Council ka leh, hynrei ngi dei ban sngewthuh ba shisien ba phi la siew tulop na ka pla tyngka jong ka Sorkar, uto u nongshah siew tulop un sngap ia ka District Council ne ia ka Sorkar Jylla” buh jingkylli u Bah Roy.
Nalor kata u la ong ruh ba ka Sorkar shisien ba ka la rai ban siew ia ki nongtrei ka Council, hato kan siew ruh ia ki MDC jong ki Council?? “Nalor ba la rai ban siew ia ki tulop, hato ka Sorkar kan shim noh ia ki bhah ba ka District Council ka ioh”. ong biang u Bah Synrem. Ha kaba iadei bad kane, u Bah Roy u la ong ba ki Council ki lum shibun ki jingioh, kata na ki mar ‘poh khyndew, lyngba ki kali, ki khajna bad kiwei kiwei. “Ka Sorkar kan leh kumno ia ka hok jong ka Council, la ki dang ioh ne em ban ioh bynta ia kine kumba la ju ioh baroh shi katta? Ngam thrai ba ka Sorkar kan ai ei ia ka Tulop?? ka jingkylli ka long, naei kata ka 70 klur kan ioh lada kam shim ia ka bhah ba ka council ka ioh??
U President ka HYC u la ong ba u kwah ban ai jingmut ia ka Sorkar ba ha ka jaka ban rai siew tulop dei ban bthah ia ki ban pynduna ka jingpynlut ksan kum ha ka jingthung pahuh ia ki nongtrei namar ki dei ban sngewthuh ia ka bor bad ka jinglah “phim dei ban bam hati kit kulai” ong u Bah Synrem ia ki Council.
