Ka Khood Ya ka Wah Myntdu kawei na ki kynhun treimon sngewbha ha kane ka sngi Saitjaiñ jong ka 9 tarik u Naiwieng kala pynlong ïa ka jingïalang ne ka Dorbar kyrpang ban ïakren halor ki lad jingïada ïa ka Wah Myntdu kaba dei kawei na ki nongbsa umbam umdih ïa ka sor Jowai bad kumjuh kaba pyndap um ïa ki nongrep ha shilynter ka Wah.
Ha kane ka sngi la wan ban ïashim bynta naduh ki nongïalam ka Khood Ya ka Wah Myntdu, ki nongïalam shnong, ki nongshong shnong kiba don ha talawiar ka Wah Myntdu, ki briew jong ka District Legal Service Authority, West Jaiñtia Hills bad ka Meghalaya State Pollution Control Board, Shillong.
Ïa ka jingïalang la pynlong ha Dorbar Hall ka Dorbar Chnong Chilliagraij, ha kaba la ïoh jingbatai halor ka phang kaba ong “Various Provision of Environment Laws and Harmful Impact of Pollutions and Environmental degradation” bala ai da ka P. Phyllei, Chief Defense counsel DLSA, West Jaiñtia Hills, bad la ïoh ruh ka jingbatai shaphang ka Solid Waste Management bad kiwei de ki bynta kiba ktah ïa ka mei mariang da u W.R. Kharkrang, Senior Environmental Engineer MSPCB.
U W.R. Kharkrang ula ong katkum kane ka juk ba mynta “lada khlem ka kyndon Aiñ kiba ïada na ka jingshah pynjulor ka mariang (Waste Management Act ) kino kino ki jingpyrkhat ki long tang shipor”, kumta ula pynnsngew ba ka KHADC kala don ïa ka Aiñ Waste Management bad ka Building Bye Law kiba long ruh kiba donkam eh, halor kane ula ai jingmut ba ka JHADC ruh ka dei ban don ïa kane ka aiñ, da kaba u kyntu ïa ki Waheh Shnong ka Ri Jaiñtia ban pynbor ïa ka JHADC ban thaw ïa kane ka aiñ Waste Management bad ka Building By Law.
Ha kaba ïadei bad ka Wah Myntdu ula pashet jingmut “lada ka Wah Myntdu ka duh noh tang na ka jingbym tip ki briew ban khieñkor ïa ka jinglong kyntang jong ka, la tikna ba ka Jaitbynriew run kan duh kan dam noh”.
Na ka liang ka Khooid Ya ka Wah Myntdu kala buh ïa ki mat ban ïakren phylliew jingmut lang ha ryngkat ki Waheh Shnong halor ka jinglong ka Wah Myntdu ha kine ki sngi ba mynta, kiba ka um dih kam long shuh kaba khuid, da kaba buh ruh ïa ka jingkyntu ïa ka sorkar kymjuh ïa ka JHADC ba kin pyntreikam hok ïa ki kyndon aiñ kiba la ai bor da ka ïing bishar, ka NGT bad kiwei de.
Ki dkhot ka Seng Khooid Ya Ka Wah Myntdu ha ryngkat ki Waheh Shnong kila kular ban buddien ïa ki kam kiba dang sah teng, na ka bynta ban pynneh pynsah ïa ka jinglong kyntang jong ka Wah Myntdu.
