Ka kur Phawa Siangshai Seng kmie kum shibynta ban ai mynsiem bad kitbok kitrwiang ïa u Shanborlang Siangshai uba long u wei na ki nong ïakhun kti ka jylla un leit ban mih khmat na ka bynta ka Ri sha Almaty, Kazakhstan ha ka World Arm Wresling Championship 2023 ka ban long ha u Nailar.
Na ka liang ka kur kala pynlong ka jingïalang kit bok kit rwiang ïa u ha kane ka 26 tarik Naitung ha ïing u ma u Hilarius Siangshai Adviser jong ka seng ha Shillong, ha ka jingïadon lang u ma Charles C Phawa General Secretary, ma u Hilarius Siangshai Adviser, u Lenar Phawa Chairman Arts and Culture, ka Meera Siangshai EC Member, u ma Donush Siangshai member bad kiwei kiwei.
Ha kane ka jingïalang ba lyngkot la ïoh ïa ki kyntien ai mynsiem na u Advicer jong ka Kur u ma Hilarius Siangshai ha kaba u ma Hilar ula ai ka jingïaroh ïa ka jingtrei shitom jong u Shanborlang Siangshai wat lada u don hapdeng ki jingduna haka bormet ruh, u ma Hilar ula ai ruh ki ktien kitbok kitrwiang ïa u ha kane ka jingïaleh kai na ka bynta ban mih khmat ïaka Ri ha ka World Arm Wresling Championship 2023 kaban long ha Almaty, Kazakhstan naduh ka 24 Tarik u Nailar haduh ka 3 tarik Nailur.
Ka kur kala ai ruh ïa ka jingkren pynshlur ïa u ba wat lada u dei u ba duna ka bor ïohsngew ruh u la lah ban pynpaw pyrthei ïa ka sap ba u don bad ka kur Phawa Siangshai ka kitbok kit rwiang ïa u ba un poi sha ka thong ka jingjop ha kane ka Tournament ba u sa leit, ha kane ka por ka kur kala ai 10,000/- tyngka naka fund jong ka kur kum ka dak ka jingïadon bynta lang ka kur bad u ha kaba un leit mih khmat ïa ka Ri, bad la pynkut ïaka prokram da ka jingduwai pyneh rngiew da u Lenar Phawa Chairman Arts and Culture ka seng.
U Shanborlang Siangshai u dei u khun jong ka Icydora Siangshai na ka shnong Khanduli, West Jaiñtia Hills u ba long ruh u samla u ba duna ha ki bor ïohsngew, u Shanborlang da ka jingtreishitom ka jong u, ula tbit bha ha ka jingïaleh kai ïakhun kti u la ju mihkhmat na ka bynta ka jylla Meghalaya.
Dangshen u Shanborlang u dang wan mih khmat ïaka jylla haka jingïaleh kai ïakhun kti kaba la long ha Mathura, Utter Pradesh bad ula ïoh khur Takma Ksiar (Gold Medal) te mynta pat u la shahjied ban leit mih khmat na ka bynta ka Ri ha ka World Arm Wresling Championship 2023 ka ban long ha Almaty, Kazakhstan.
