Ka Khasi Jaintia Deficit School Teacher Association KJDSTA mynta ka sngi ka 12 tarik Naiiwieng 2025 ki la wan iakynduh ia u Myntri ka tnad Pule Puthi u Bah Lakmen Rymbui ban iakren halor ka jingkynduh jingeh ki nonghikai Deficit ha kine ki 2 snem ba la leit.
Haba kren sha ki lad pathai khubor u President ka KJDSTA u Bah Bosewell Pala u la pyntip ba ha ka jingkynduh bad u Myntri ki la pynsngew halor 4 tylli ki mat kiba ki nonghikai deficit ki kyrpad ia u Myntri bad ka Sorkar ban leh ei ei.
Ka mat kaba nyngkong kaba ki nonghikai deficit ki la pynsngew ha u Myntri ka dei halor ka jingong u Myntri ba kan don noh tang 2 tylli ki kynhun jong ki Nonghikai, kawei pat ka mat ka dei halor ka jingpynslem bad ka jingbym siew shuh ia ka DA ba dei ban ioh kum ki nonghikai deficit, kaba lai ka dei halor ka jingpyntreikam noh ia ka CPF Scheme Centralised Provident Fund, bad kaba saw ka dei halor ka kynrum kynram kaba mih na ka Megh Sim Portal.
Nalor kata u la ong halor ka jingphiah ia ar tylli ki kynhun nonghikai u la pyntip ba u Myntri u la ong ba kan sa don da ka New Pay Structure bad kam don jingktah ia ki Nonghikai Deficit.
Halor ka jingbym siew shuh ka sorkar ia ka DA kumba siew ia ki nongtrei sorkar ki nonghikai Deficit ki dang ioh tang 43% katba ki nongtrei sorkar ki la ioh 51 % bad ki kyrpad ia u Myntri ban leh ei ei halor ka DA bad u Myntri u la pyntip ba kan sa don ka jingialang bad ka tnad Pule Puthi halor ka jingbym ioh ia ka DA La ong u President.
U la bynrap haba iadei bad ka CPF kan sa don ka jingialang bad ki don ki nonghikai kiba la shongthait wat kiba la khlad noh kim pat ioh ia ka CPF bad na ka liang u Myntri u la kular ban shimkhia haba iadei bad ka CPF Centralised Provident Fund.
Khatduh u la ong halor ka kynrum kynram ha ka Megh Sim Portal ki la pynsngew ha u Myntri bad u Myntri u la pyntip ba ka Megh SIM ka dei kaba donkam bad ka lynti kaba shakhmat ha ka pyrthei mynta bad u kular ban shimkhia ia kane ka bynta.
