Ka Kur Pyrtuh Sohmynting ha kane ka 17 tarik mynta u bnai ka la ïoh ban pynkup burom ïa u Dr. Ebormi Langshiang ha Community Hall jong ka Kur ha ka por 11 baje shiteng mynstep ha Sohmynting.
Kane kala long shisha ka sngi ban sah kynmaw ïa ka Shnong Sohmynting namar u Dr. Ebormi Langshiang u long u soh nyngkong ban ïoh ïa kane ka kyrdan pule.
Ha shwa ban pynkup burom ïa une u samla u ba la pass bha ïa kane ka kyrdan Ph.D ka la don ka jingïalang kaba lyngkot ba la pynïaid da u wasan ka kur Pyrtuh u ma Lephing Pyrtuh ha ryngkat ka jingïadon lang ki Executive Members ka kur, ki seng Long kmie bad ki khun samla jong ka Kur.
U ma Ling Pyrtuh haba kren ha kane ka jingpynkup burom u la pynkynmaw ba U Dr. Ebormi Langshiang u long u briew u ba sngewtynnad bad uba don ka mynsiem ia treilang la ha kino kino ki liang ha ka imlang sahlang bad u la kitbok kitrwiang ïa une u samla ba un nang kiew sha phrang ha ki liang baroh.
Uma Simon Pyrtuh uwei na ki rangbah ha ba kren ha kane ka sngi u la ong “ban ïoh ïa ka jing jop bad ban poi sha kliar jong ka nam kam long ka basuk, dei tang da ka jingtrei shitom bad jingminot ka ba lah ban pynkiew ïangi sha kliar jong ka nam”.
U ma Monjur Pyrtuh haba kren ha kane ka sngi ula ong ba kum ka Kur ngi sngew sarong ban ïoh pyndon burom ïa kane ka sngi ka ba khraw na ka bynta une u khun samla uba mih na u symbai jong ka Kur Pyrtuh. u la ong kum u soh nyngkong ban ïoh ïa kane ka kyrdan pule ka ba long ka burom ym tang ïa ka kur ka jait lane ïa ka shnong ka thaw hynrei ka long ka burom ïa ka Ri bad ka Jaitbynriew hi baroh kawei. Shuh shuh u la bynrap ba kum ki long kmie long kpa ngi dei ban pynshlur ïa la ki jong khun ki kti ba kin trei shitom ban poi sha ka thong jong ka jimgim ha ki liang baroh.
Hadien ba la dep pynkup burom ïa u Dr. Ebormi Langshiang la khot ïa u ban ai katto katne ki kyntien ha ka jingïadei bad kane ka sngi ba kyrpang jong u. Haba kren kum u nong shah pynkup burom u Dr. Ebormi Langshiang u la ong ban poi shaduh kane ka kyrdan kam long ka basuk hynrei hap ban trei shitom ban minot thop ha ki kam. U la ong teng teng u sngew kum ban iehnoh ïa ka kam pule ha shiteng lynti hynrei dei da ka jingai mynsiem jong u nonghikai jong u, u la bteng biang ia ka jing pule.
U la ong ba dei lyngba ka jingkyrkhu U Blei ba u la lah ban poi haduh kane ka kyrdan jong ka nam. Shuh shuh u Dr. Ebormi Langshiang u la ong wat lada u kpa jong u um don shuh ha sla jong kane ka pyrthei naduh ba u dang leit skul hynrei dei ka jingkyrkhu i pa na lyndet ki lyoh bad dei ki jingsneng jong i ba nga ïai trei shitom ban pyn urlong ïa ka jingkwah jong i pa. ula ong ba ‘Dei i Mei iba ju ai mynsiem bha ïa nga ban ïai shah ïa ki jingeh bad ban ïai trei shitom ban ïoh ïa u soh jong ka jingjop ha ki jingpule jong nga”.
