-Dawa pynsangeh ka KSA ia ka kong Binikas Laban ban ialeh ia ka Election MDC-
Hadien ka jingpur stet ka khubor haki rynsan Social Media bad ki lad pathai Khubor hapoh Karbi Anglong Assam hadien ka jingleit ïalap elekshon jong u ma Aiborlang Shadap sha ka Shnong Mowjem Block-1 bad ka jingïakhun MDC jong i Kong Binikas Laban iba naka shnong Mowluber ba ki Karbi ki pyrshah jur ïa kane da kaba ong bad kam ba kane ka jaka ka danghap hapoh u pud u sam jong ka West Karbi Anglong, Assam.
Ha ka juh ka por, ka seng Karbi Students Association (KSA) kala maham lyngba ki lad pathai khubor ba ki Khasi Pnar na Meghalaya kim dei ban leit pynlong jingïalang Election Campaign shapoh Labang Nangphyllut & Pangam Raliang.
Ki pyrshah bad ki dawa ruh na ki bor District Administration jong ka West Karbi Anglong, Assam bad Karbi Anglong Autonomous Council ban nym shah ïa ka kong Binikas Laban ba kan ïa khun Election sha JHADC namar ba kadei ka briew kaba napoh Karbi Anglong bad ka shnong jong ka ruh ka dei napoh Karbi Anglong Assam.
Shuh shuh kila pynkynmaw ruh ïa ka jingbym leit thep vote jong ngi ki Khasi Pnar sha ki artylli ki Election jong ka jylla Assam ka MAC (Member of Autonomous Council) bad MLA Election bad ki pyrshah ruh ïa ki Khasi Pnar jong ka Block-1 ban leit shim bynta ha ki Election jong ka jylla Meghalaya.
Ki ong ruh ba kin sa ïakren bad ki Border Committee jong ka West Karbi Anglong ban leh ei ei bad ban peitngor halor kane ka kam.
Kumta na ka liang ka Hynñiewtrep Border Disputed Redressal Forum (HBDRF) ha ka kyrwoh khubor ba la phah kala pyntip halor kane ka jingeh kan sa leit ïa kynduh ïa u Deputy Commissioner jong ka West Jaiñtia Hills District lashai ka sngi 10.2.2025 ha ka por 12 baje mynsngi ban ïakren ïa kane ka kam bad ban dawa ruh na ki bor sorkar ba kin ïakren mardor bad ka Assam khnang ban pynneh pynsah ïaka shongsuk shonsaiñ ha kane ka thaiñ.
“Hooid, wat la kam don kano kano ka jingmaham na kane ka seng (KSA) ruh ngi dei ban husiar bad ïatylli ïa ryntih ïoh ba kin don ki riew shim kabu ban wanrah ne pynmih ïa ka jingïakyn-ad ne ka huri hura” ong ki nongialam ka HBDRF.