U MLA ka North Shillong u Bah Adelbert Nongrum u la pynpaw ia ka jinglyngnoh halor ka jingshah sospon ha ka Voice of the People Party.
Haba kren sha ki lad pathai khubor, u bah Adelbert u la ong shuwa ka election MDC, la kyrpad ia u President ka party ban khot iakren ia ki 5 ngut hynrei khlem urlong ka jingkhot jingialang bad u la ong ba kaba lyngngoh ka long ba ki ai showcause da ka jingthoh bad ki hun ban sospon, watla kim pat pynpaw paidbah ba u la shah beh syndon na ka party.
U la ong ruh ba u sngewkhia ia ki paidbah ka constituency jong u kiba la pynjop ia u bad lada ka party ka beh syndon ia u bad lada um ioh shuh ban kren ha ka Voice of the People Party, hynrei un ieng ha ka sur jong ki paidbah.
U Bah Adelbert u la ong ba lada ki la wit ia u ban long u dkhot hapoh ka seng ki dei ban beh syndon ia u na ka seng ym ban shu sospon.
U la iathuh ruh ba ha ka por ba u rung ha ka VPP u khlem rung ban pan ticket hynrei halor ka nongrim ba ka VPP ka pdiang ban dawa ia ka Reservation Policy, hynrei ma ki hi kiba la pynkhein ia kane namar ba ki ai jingmut sha ka Expert Committee tang ia ka Reservation on Job Population bad ia ka reservation halor ka pule puthi ki khlem rah bad ia ka Roster ki khlem rah lang.
U la ong ruh ba u khlem leh ia kaei kaei ban pynbudnam ia ka party hynrei ban kyntiew ia ka jadbynriew bad ban ioh nong ruh ka VPP.
Shuh shuh u la kyntu ia ka seng ba wat haba u dang don ha ka jingshah sospon hynrei ki dei ban khot ia u bad ia ki 5 ngut kiba la shah sospon lang ban iakren markhmat .
U la ther tyngeh ruh da kaba kynthoh ia ka seng ba phi kam ba kadei ka seng kaba don ia ka nongrim Blei, ban wanrah ia ka saiñ pyrthei kaba khuid ba suba hynrei u Blei u iohi ia ka jingshisha.
U la ong ba “kumba nga la kwah ban rung sha ka seng ba ngam kwah shuh ban mih kumta hashwa ba ngan pynkylla ia ka nongrim jong nga ngan iehnoh lut shwa ia baroh kiei kiei”