Mynta ka sngi ki khun ka Seiñ Raij Jowai ki la mih madan ban pynlong ïa jinglehkmen ‘Chad Sukra’ ba shisien shisnem, hashwa ba ki khun ki hajar kin hiar rep sha ki hali ki pynthor ban bet ïa u symbai u kba.
Ka phang jong kane ka Chad Sukra mynta u snem 2023 ka long “Chaniah tylli heimon mi Blai, kam wa pynkhroo iei wada dep booh mi ha pyrthai” bad ïa kane ka Shad Sukra la pynïaid da ka Arts & Culture Committee jong ka Seiñ Raij Jowai.
La sdang ïa kane ka Chad Sukra naduh hynnin ka sngi ha la ki jong ki jong ki dong ki shnat da kaba pynlong ïa ki jinglehkai drama bad mynta ka sngi kaba dei ka sngi mih ïew, ki khun ka Raij Jowai naduh ki longkmie ki longkpa, ki khun samla bad ki hep kiba rit ki la mih ryngkat ki riam ki beit ba itynnad bad ba iphuh iphieng.
Ha Madan Mynkoi Pyrdi Loompydi Ïongpiah Jowai la sdang ïa ka Shad Sukra ha ka por 10 baje mynstep, katba ha ka por janmiet la pynlong ïa ka shad Sukra ha Iawmusiang, ha ka jingpynïaid u ma O. R. Shallam President ka Seiñ Raij Jowai, ha kaba u ma Comingone Ymbon ba dei peit ïa ka tnad Cooperation Department, Food Civil Supplies & Consumer Affairs Department, bad kiwei de ula long u Kongsan.
Haba ai jingkren u ma Ymbon ula ai khublei ïa ki nongïalam ka Seiñ Raij kiba la lah ban pynlong ïa kane ka prokram Chad Sukra kaba phuh ba phieng kaba long kum shi bynta ban pynneh pynsah ïa ka Riti ka Dustur. Kumta u kyntu ban pynneh pynsah ïa ka mariang da ka pynduh pyndam ïa ka jingthang khlaw namar mynta ka jingkiew ka jingshit kala jur shaba palat katba nang mih ki sngi.
U ma O.R Shallam ula kyntu ba dei ban burom ïa ka mei mariang da kaba pynlong ka jingthung dieng da ka jingkhitkhlieh jong uwei pa uwei u nongshong shnong ka bri u Hynñiewtrep Hynñiewskum, da kaba u ong ba ka jingthmu jong ka Chad Sukra mynta ka snem ka long ban pynjyrngam biang ia ka mei mariang ban ïoh ïa ka jingkhuid jingsuba ha baroh ki liang.
Ha Ïawmusiang kiba ïashim bynta ha ka jingshad ki kynthup ïa ka WWO, SRJ, Iawmusiang, Sein Tylli Lang, Seinraij Ummulong, Seinraij Shillong, Iongpiah, Loomkyrwiang, Dulong, Loomiongkjam, Seinraij Raliang, Tpep-Pale, Umchangiar, Chilliangraij bad ka Panaliar.
