Ki Dkhot ka KSU West Jaiñtia Hills District Unit mynta ka sngi ka 21 tarik Nailar 2024 ki la iakynduh ia ka Myntri ka Tnad ka Koit ka khiah ka Dr. Mazel Ampareen Lyngdoh.
Haba iakren sha ki lad pathai khubor ka KSU West Jaintia Hills District Unit ka la pyntip ba ka jingwan kynduh ia i Dr Mazel Ampareen Lyngdoh ka long halor lai tylli ki mat jingdawa.
Ka mat ba nyngkong, na ka Liang ka Sorkar ka la ai ia kawei ka Sub Centre ha ki San shnong ba kynthup ia ka Shnong Pynksan, madan Rwan, Kyrweng, Iawlang bad Iawkmai ha kaba ka la don ka jingbym ia sngewthuh jingmut hapdeng ki San Shnong na ka daw ba don katto kattne ki riewshim kabu kiba pynthut ia ka jingtei ia katei ka sub Centre bad na ka liang ki Dkhot ka KSU ki la kyntu ia ka Dr Ampareen Lyngdoh ban shimkhia halor kane ka bynta bad ban pyndep noh ia ka jingtei ia katei ka Sub- Centre khnang ban wanrah ia ka jingmyntoi ia ki Shnong ba don ha katei ka thain.
Ka mat ba ar ka long ba ka la don kawei ka PHC ba la slem bha kumba 40-45 snem ha ki thaiñ Barato kaba shakri kumba 13 tylli ki shnong la donkam ban kyntiew kyrdan noh sha ka CHC bad ki tiar ruh ki dang duna bha ha katei ka PHC.
Ka mat kaba lai ka long naduh ba kyntiew kyrdan ia ka Namdong PHC sha ka CHC ka Surok ka sniew haduh kata kata khamtam ia ki briew ba wan shim dawai ki ba pang ba shitom bad ki tiar ki tar ha katei ka CHC ruh ka dang duna bha.
Na ka liang i Dr Ampareen Lyngdoh i la kular ban shimkhia ia kine ki mat, i la ong ba in bthah ia ki briew jong ka tnad ka koit khiah ban leit jngoh ban peit ia baroh ki jingdonkam ha baroh lai tylli ki jaka ban pynbiang ia ki jingdonkam jong ki paidbah katei ka thaiñ.
