Ka Meghalaya Arm Wrestling Association (MAWA) ryngkat ka jingsnohkti lang bad ka Bouncer Association of Meghalaya ha ka 5 Tarik Naitung 2024 ka la pynlong ia ka jingjied ia ki nongmihkhmat na ka bynta ka jingiakhun kti kaba heh tam ha ka pyrthei kaban long ha Moldova, Europe.
Ka Meghalaya Arm Wrestling Association hapoh ka jingialam jong u Bah Junestar Kharbuli, ka la pynlong ia kane ka jingiakhun kti ha surok jong ka Malki Point kaba long ruh shibynta ban pynphriang ia ka jingkordor ki kam ialehkai khamtam ban lait na ki jingdih pynbuaid kum ki kiad, droks, kynja ba kiwei.
Haba iakren sha ki lad pathai khubor, u Bah Junestar Kharbuli u la ong ba nalor kine kiwei pat kiba ka MAWA ka la jied kan phah ia ki ‘rang bad ki ‘thei ialehkai khun kti sha kane ka lympung baheh bha kynthup ki katto katne ngut ki ‘rang bad ki ‘thei iakhunkti ba la paw bha na kane ka jylla.
Khyndiat u la kren diaw ba tad haduh mynta, ki khlem pat don kano kano ka jingioh jingiarap na ka sorkar bad kumta na ka liang ka MAWA ka hap ban phah noh tang khyndiat ngut ki nongialehkai.