Ha ka thong ban ong em ïa u Duma ne ka World No Tobacco Day-2023 ka ban long ha ka 31 tarik u Jymmang, ki khynnah skul ha man la ki shnong ki thaw ka jylla mynta ka sngi ki la mih ban ïashim bynta ha ka Tobacco Rally bad Signature Campaign halor ka theme kaba ong “My Meghalaya, Tobacco-Free Meghalaya”.
Ha West Jaiñtia Hills District la sakhi ïa ka jingïashim bynta shongshit ki khynnah skul ha Jowai ha ka Rally Against Tobacco bad ka Signature Campaign kaba la pynlong ha ka dur jong ka jingïakop hapoh ka jingpeit jingpynïaid jong ka State Tobacco Control Cell ryngkat ka jingïatreilang ka State Education Department bad ka Sambanh Health Foundation.
La ïathuh ba ka jylla Meghalaya kadei kawei na ki Jylla ba bun eh ki briew ba kyrni ha ka jingdih biri, siktret, duma bad ka long ruh ka jylla ba bun eh ki briew ba ïoh ïa ka jingpang bampong na ka daw jong ka jingdih biri, sikret bad bam duma.
Kumta ka jingpynlong ïa kane ka prokram ka long shibynta ban khot kyrpad bad wer ïa ki paidbah nongshongshnong ban kin ïatreilang da kaba kiar na ka jingmlien pyndonkam ïa u biri, sikret, duma kiba long ka bih ïa ka jingim ba kordor jong ki briew.
