Ka Dorbar Shnong Khimusniang na ka por sha ka por ka shait pynmih ia ki kyndon aiñ kiba iadei bad ka jingwanrah ia ka shongsuk shong shngaiñ hapoh u pud u sam jong ka shnong ka thaw. Ha kane ka kynti ruh sa shisien ka DS Khimusniang kala pynkynmaw biang sha ki paidbah ba ka shnong kala buh ia ki jingmana bad ruh ki jingpynshitom lada lap ia kiba ialeh pyrshah ne pynkheiñ ia ki kyndon aiñ jong ka shnong.
Katkum ka khubor bala phah da u General Secretary ka DS Khimusniang u ma W. Bamon ula pyntip ba ka shnong kala mana ba ym bit ban leh ia ki kam sniew hapoh u pud u sam ka shnong kiba kynthup ia ka jingshong dih kyiad / drugs / dih kanja hapoh ki kali ne ha ki lynti syngkieng, ym shah ban iengkai ha ki lad ne shong ha ki jaka badum, ym shah ban kren kino kino ki ktien sniew ne ban iashoh iadat hapoh shnong, ym shah ban pynlong kino kino ki kynja jingiakhalai, ym shah ban pynlong jaka hikai ñiah Kali, Bike lane Scooty hapoh ki surok shnong, ym shah ia ki kali ban tem pynher sur hapoh shnong, ym shah ban ñiah speed ia ki kali ne ki Bike, la khang ruh ban pynieng ia ki kali ha ki jaka bala thoh No Parking, ym shah ia ki kali ban iaid da kaba pyniap shabi (neutral) bad da kaba pynlip ia ki lait jong ki ha ka por mynmiet.
Shuh shuh ka DS kala mana tyngeh ban ym shah ban bret pathar ia kino kino ki kynja Plastic ne song jingbam / ki jhep ba bun jait ha ki surok ne lynti shnong.
Kino kino kiba pynkheiñ ia kine ki kyndon aiñ la ki dei ki trai shnong ne kiba na bar shnong ruh kin shah pynshitom katkum ki kyndon shnong bad kin hap ruh ban siew ia ka kuna kaba T.5000/- (San hajar tyngka) bad ka shnong kan sa aiti ruh ia ki sha ki bor jong ka aiñ.