Ka lehñiam shad Behdeiñkhlam jong ka Seiñ Raij Mukhla mynta u snem, ka la poi sha kaba kut mynta ka sngi U Blei 31.08.2025, kaba la sdang ha kine ki sngi ba la dep da ki jingleh niam bapher bapher, ia kaba la pynkut mynta ka sngi ha pung Aitnar Mukhla hapdeng ka jingiaidbeit iaid ryntih bad ka jingiphuh iphieng. Ka shad Behdeiñkhlam jong ka Sein Raij Mukhla ka dei ruh ka Behdeiñkhlam kaba khatduh eh ban pyndep jong u snem.
Mynta ka sngi la sdang ïa ka lehñiam Behdeiñkhlam naduh ka por mynstep ha kaba la don ka jingkynting ïa ki Deingkhlam ha ‘Iung Blai’ bad ka shad ka kñia da ki Waheh, katba ha ka por mynsngi la don ka jingïakynduh ki rong ki rup ha madan Slotmasi bad ka jingpynpoi ïa ki Diengkhlam bad ki rot 14 tylli ha Wah Biar (Aitnar).
`Na ka liang ki khun ka Seiñ Raij Mukhla ki la wanrah ïa ka rot ha pung Aitnar ha ryngkat ki khubor bapher bapher. Na ka liang ka Seiñ Raij Mukhla ka kyrmen skhem lyngba ka jingpyndep ïa kane ka lehñiam kan wanrah ïa ka bha ka miat bad ka roi ka par ha baroh ki liang.
Ha kane ka sngi pynkut ïa ka Behdeiñkhlam ka Seiñ Raij Mukhla la wan sakhi lang da u Symbud Myntri Rangbah ka sorkar jylla u ma Sniawbhalang Dhar, ka jingkit bok kit rwiang lyngba ka Online Screen na u Dr. Sukanta Majumdar Minister of State, Ministry of Development of North Eastern Region Government of India, u MLA ka Jowai ma Wailadmiki Shylla uba la pyniaid ruh ia ka programe, MLA Sutnga-Saipung kong Santa Mary Shylla, u Sunil V Deodhar Social Worker, u Superintendent of Police ka West Jaiñtia Hills District, u Dolloi ka Elaka Jowai ma Puramon Kynjing, ki MDC, ki waheh wasan jong ka Raij nalor kiwei de.
Mynta ka sngi la plie ruh ïa u maw nongrim jong ka project “Construction of Cultural Infrastructure of 6 (Six) Seiñ Raij in East bad West Jaiñtia Hills District” ba kynthup ïaka Tuber, Ialong, Mukhla, Muthlong, Sohkymphor bad Chyrmang ha ka jingmang pisa kaba Rs. 1,93,08,034.00 (Shiklur, Khyndaiphewlai Lak, Phra Hajar, Laiphewsaw) tyngka.
