Ka Behdieñkhlam ka Sein Raij Tuber kaba dei ruh ka Behdieñkhlam kaba heh duh hapoh Ri Lum Jaiñtia kaba ju pynlong shisien shi snem, mynta u snem ka la poi sha kaba kut mynta ka sngi 17.07.2023, hapdeng ka jingiphuh iphieng.
Mynta u snem la wan rah ïa ki Rong (Rot) kiba itynnad haduh kumba 65 tylli ha Biar (Aitnar) ka Raij, hala ka jong ka jong ka jingpynwan dur lem ki jingthoh bapher bapher ha ki rot da ki khun ki hajar ka Seiñ Raij Tuber Kmai Shnong, ki ba shong sah sha ki shnong baher bapher jong ka Ri lum Jaiñtia bad ruh ki dong bapher bapher kiba don ha ka shnong Tuber kaba la wan ban sakhi bad pynshong shit ïa kane ka Behdeiñkhlam ka Raij Tuber da ki hajar ngut ki paidbah kiba na Ri Khasi Jaiñtia bad na kiwei de ki jaka.
La sakhi ïa kane ka sngi pynkut ïa ka Behdeiñkhlam bad noh rong jong ka Raij Tuber da u Symbud myntri ka jylla ma Sngiawbhalang Dhar uba long ruh u kongsan, ha ka jingïadonlang ruh u ma Kyrmen Shylla MLA ka thain, SP EJHD, Dolloi Elaka Jowai ma Puramon Kynjing, ma Justine Dkhar Ex-MLA, ki MDC ka Jaintia Hills Autonomous District Council bad kiwei de ki bala shah khot sngewbha. U ma Sngiwbhalang Dhar uba long u kongsan khnang ban nangpynbha shuh shuh ia ki jaka ki puta jong ka Raij u la ai sngewbha 1 lak tyngka sha ka Seiñ Raij Tuber.
Na ka liang ka Seiñ Raij Tuber ka la aiti ruh ïa ka Memorandum ha u ma Sniawbhalang ha ka jingïadei bad ka jingdonkam ban pynbha ïa ka jaka jong ka Aitnar bad ki lynti synkieng ha kaba na ka liang jong u ruh u la kular ban ïarap katba u lah.
Ha shwa ban noh ïa ki Rot la don ka jingïatan ïa ka Dieng Bhang kaba long kum ka jingïalehkai hapdeng ki arkynhun ka phang Raij Tuber neng bad ka phangwah bad la don ruh ka jingïaslait ne ka jingïalympat.
