Ki Nongshong shnong jong ki Dong bad ki kyntoit bapher bapher jong ka shnong Mihmyntdu wat hapdeng ka jingslap bad ka jingmaham ka suiñbneng ban pynhap ia u lapmynsaw (Phria), pynban ki Nongshong shnong ki la iamih paidbah naduh ki Tymmen, Rangbah, ki Kynthei, ki khun samla (Khynroo-Khyllood) bad ki khynnah rit sha Madan ialehkai Bol ka jaka ba pynlong ia kane ka Chadsukra kaba shisien shisnem jong ka shnong kaba la pyndap hi smam da ki nongpeitkai, ki nongshah khot sngewbha bad ki nongiashimbynta ha ka shad, ka ruwai ha kane ka Chadsukra.
Ka Chadsukra jong ka shnong ka long kaba iphuh iphieng ha ki riam bapher bapher. Ki kynthei ha ka riam Ryndia, Muka bad ka jingdeng Ksiar, Deng Paila kumjuh ki Shynrang ha ka Jainspong bad ka jingdeng Kpengksiar bad Paila. Kum ban shu ong noh ba ka sngi Chadsukra ka dei ka sngi jingkmen bad ka sngi jingpyni rong ia ka jingdon jingem jong ki ha ka riam ka beit bad ha ka ioh ka kot, shwa kim pynhap ia u symbai u rnai sha ki kper kip rah, hali ki pynthor jong ki.
La nangpynkhraw ia kane ka sngi da ka jingdon ryngkat u Doloi Jowai, Doloi Puramon Kynjin, ki Nongbud nongrap jong u bad ki Nongshah khot sngewbha. Ha kane ka sngi ha baroh ki Items la iashim bynta shongshit da ki Nongshong shnong jong ki Dong bapher bapher jong ka shnong Mihmyntdu. Ka Chadsukra ka long kaba iaidbeit iaidryntih naduh sdang kynrong sngi haduh ban da kem iongreiñ.
Ha kane ka Chadsukra, ki nongshong shnong jong ka Mihmyntdu ki la ioh ia ka jingiaroh na ki Nongwan peitkai naba ki Nongwan peitkai kim khuslai shuh ia ka bam, ka sa, ia ka ja, ka doh, ia ka sha ka dud bad ia kiwei de ki jait jingbam da ka jingdon baroh ki jait jingbam ha baroh sawdong ka Madan da ki Dukan.
