Ka Behdeiñkhlam ka Seiñ Raij Tuber kaba dei ruh ka lehniam behdeinkhlam kaba heh duh hapoh Ri Lum Jaintia kaba ju pynlong shisien shi snem, mynta u snem ka la poi sha kaba kut mynta ka sngi 19.07.2024, hapdeng ka jingiphuh iphieng bad ka jingwan sakhi da ki phew hajar ngut ki paidbah na Ri Lum Khasi Jaiñtia bad nawei de.
Mynta u snem la wan rah ia ki Rong (Rot) kiba itynnad kiba don kumba 68 tylli la pynpoi ha Biar (Aitnar) ka Raij, hala ka jong ka jong ka jingpynwan dur lem ki jingthoh bapher bapher ha ki rot da ki khun ki hajar ka Sein Raij Tuber Kmai Shnong, ki ba shong sah sha ki shnong baher bapher jong ka Ri lum Jaiñtia bad ruh ki dong bapher bapher kiba don ha ka shnong Tuber kaba la wan ban sakhi bad pynshong shit ia kane ka Behdeiñkhlam ka Raij Tuber.
La wan ban sakhi ruh ia kane ka sngi pynkut ia ka Behdeiñkhlam bad noh rong jong ka Raij Tuber da u myntri ka tnat Art and Culture u bah Paul Lyngdoh kum u kongsan, u myntri ka tnat Revenue and Disaster Management uba long ruh u MLA ka thaiñ u ma Kyrmen Shylla, ka MLA Sutnga-Saipung kong Santamarry Shylla, ki Doloi na ki elaka bapher bapher jong ka ri Lum Jaiñtia, ki MDC ka JHADC, ki DC, ki SP jong ka East bad West Jaiñtia, President jong ka Seiñ Raij Tuber ma Helping Phawa bad kiwei de ki ba la shah khot sngewbha.
Na ka liang ka Sein Raij Tuber ka la aiti ruh ia ka Memorandum ha u bah Paul ha ka jingiadei bad ka jingdonkam ban pynshna shuh ia ki jaka shong jong ki paidbah (Gallery) jong ka Aitnar, ha kaba na ka liang jong u myntri u la mynjur ban iarap ia kane ka kam hadien ka jingia kynduh bad ki nongpyniaid ka Sein Raij Tuber.
Ha shwa ban noh ia ki Rot la don ka jingiakop iatan ia ka Dieng Bhang kaba long kum ka jingialehkai hapdeng ki ar kynhun ka phang Raij Tuber neng bad ka phangwah bad la don ruh ka jingiaslait ne ka jingialympat.
