Kum shi bynta na ka jingrakhe ia ka Republic Day kaba 73 ha shityllup ka ri India ha nongbah Jowai ruh la rekhe lang ia kane ka sngi, wat la ka don ka jingduna na ka jingwanpoi ki paidbah bad ruh ka jingbym don jong ki skul bad College ban iashim bynta na ka daw jong ka khlam Covid-19.
U bah Preston Tynsong Deputy Chief Minister ka jylla ula wan ban pynher ia ka lama lai rong jong ka ri India bad shim ruh ia ka Salute ha ka jingrwai ia ka National Anthem ha madan Jrisaleiñ.
Haba ai jingkren u bah Preston ula ong ba wat la ka jylla bad ka ri hi baroh kawei ka ia kynduh ia kane ka jinglynshop jong ka jingpang khlam Covid-19, hynrei na ka liang jong ka sorkar kala pyrshang katba lah la ka bor ban wan rah ia ki kam pynroi hapoh ka jylla.
U bah Preston ula ong ba haba ia nujor bad ki 50 snem kiba la leit ka jylla kala nangkiew ha kiba bun ki liang kiba kynthup ia ka jingdon jong ki nongshong shnong, ka jingkiew ha ka pule puthi na ka 29.49% sha ka 74.43%. Kala don ruh ka jingkiew ha ki tnad sorkar bapher bapher, ka jinglah ban shna ia ki surok na ka 150 KM ha u snem 1972 sha ka 1100 Km mynta. Kala don ruh ka jingkiew ha ka jingpynmih bor ding na ka 60 MW sha ka 353 MW.
U bah Preston ula ong ruh ba ka jylla kala shim khia bha mynta ban pyndep noh ia ka jingiapynbeit pud hapdeng ka jylla bad ka jylla Assam, bad kane kam kala iaid shait shi shait bad la khmih lynti ba yn sa lah ban pyndep ia kane ka kam. Namar kumba long mynta kane ka kam ka la sah ha ka tnat kam Pohïing ka sorkar India hadien bala leit aiti ia ka ha ka 20 tarik mynta u bnai ha nongbah New Delhi da ki ar Chief Minister.
Ka sorkar kala shimkhia ruh ban pynbiang ia ki lynti syngkieng sha ki nongkyndong lyngba ka skhim PMGSY kumjuh ruh ka umbam umdih kaba khuid bad suba sha baroh ki nongkyndong lyngba ka Jal Jeevan Mission Scheme bad haduh mynta ka sorkar kala lah ban pynioh um haduh 2 lak tylli ki long ïing. Ka Jylla Meghalaya ka long kawei na ki ar tylli ki jylla hapoh ka ri India kiba la pyntrei hok ia kane ka skhim.
U la ong shuh shuh ba ka sorkar kala shim khia ruh halor ka koit ka khiah jong ki nongshong shnong. Kumba long mynta ka sorkar kala ioh jingiarap lyngba ka jingbeit pisa ka World Bank haduh 350 klur ban pynbha pynmiat ia ki jaka sumar bad ia ka tnad ka koit ka khiah.
Ka sorkar kala don jingthmu ruh ban plie noh hapoh une u snem 2022-23 ia ka Jowai MCH, ka Nongstoin MCH, ka Hospital ba 100 jingthiah ha Khliehriat, ka Lawbah PHC, ka Marmain PHC bad ka Kasiabari PHC. Ka sorkar kala buh thong ruh ban pyndep noh ia ka Meghalaya Legislative Building ba thymmai ha New Shillong.
Ka sorkar ka don ruh ka thong ban kyntiew ia ki kam jngohkai na ka 3% sha ka 15% GSDP ha kine ki shiphew snem ban wan.
U bah Presto ula khot la wer ia baroh ki nongshong shnong ban shim ia ka jingkular halide ban bat skhem ia ka dor jong ka synshar paidbah bad ruh ban pynthikna ia ka ri kaba laitluid, da kaba kynmaw burom ia ki khlawait jong ka jylla kum u Tirot Sing, u Kiang Nangbah bad u Pa Togan N Sangma bad kiwei de ki riew ieit ri.
Ha kane ka sngi kala don ka jingpyni ia ki Tableau kiba pynpaw ia ka jingtreika jong ki tnat sorkar bapher bapher kumba 11 tylli. La sam ruh ia ki syrnot sha baroh kiba iashim bynta ha kane ka jingrakhe kynthup ia kiba iashim bynta ha ka jingshad.
Ha Amlarem Civel Sub-Division ruh la rakhe ia kane ka sngi ha kaba u ma Wailadmiki Shylla MLA ka 2-Jowai u la wan pynher ia ka lama.
Ha Shangpung ruh la rakhe ha kaba u ma Comingone Ymbon ula long u kongsan.
