Mynta ka sngi ka kynhun ki nongthoh Khubor ki lah ioh ban ia kynduh bad kren bad uwei na ki nongrep na ka Shnong Mukhla Nongrim, West Jaiñtia Hills District, u samla rangbah u Bormi Sari.
Haba kren sha ki nongthoh khubor u Bormi ula pynpaw ba wat la u ia kynduh shibun ki jingeh ha kaba iadei bad ka jingsumar ban pynheh pynsan ia ki jhur ki jhep, ha kaba ula hap ban pynlut ia ka por bad ka bor nalor ka pisa tyngka, hynrei da ka jingkyrmen u iai minot ha kane ka kam.
U Bormi ula iathuh ba ha ki aiom Tlang u shem jingeh bha ban sumar ia kine ki jhur ha ka kper jong u. Ban pynheh pynsan ia kine ki jhur ka shimpor ia u haduh 3 bnai haduh ban da ioh ban kheit ne die ia ki.
Shuh shuh ula ong ba wat hapdeng ki jingeh hynrei mynta ula iaid lynti ha kane ka kam rep la 3 snem kaba u la sdang naduh u snem 2019 ha kaba u iohi ba ka long kaba myntoi bad ka long ruh ka lad kamai kajih ia u.
Hynrei na ka liang jong u Bormi ula pynpaw ka jingsngewsih namar ba haduh mynta um pat ju ioh kano kano ka jingiarap na ka liang jong ka sorkar wat la ula ju leit mih bun bun sien sha ka tnad Agriculture ban pan jingiarap, kumta ula hap hi ban trei shitom thop pa thop da la ka jong ka bor.
