U Myntri ba dei peit ïa ka Revenue & Disaster Management Department jong ka sorkar jylla u ma Kyrmen Shylla ha ryngkat u bah A.L. Hek kila poi sha West Jaiñtia Hills na ka bynta ban khot ïa ka jingïalang ban ïoh jingtip halor jingjia bad jingjulor ba la wanrah da ka mei mariang ha kine ki khyndiat sngi hapoh ki ar District jong ka West bad ka East Jaiñtia Hills.
Ha kane ka jingïalang la wan ban ïadon ryngkat da baroh ar ki Deputy Commissioner jong ki ar District kata u bah B.S. Sohliya, IAS bad u Abhilash Baranwal, IAS, la ïadon ruh u SDO Amlarem Civil Sub-Division Dr. Abhishek Saini, IAS, u bah M.B Tongper ADC, Jowai, ka kong J. Kharpuri, ADC, Khliehriat, bah S Phanbuh bad bah W.K Kharbuli, Assistant Commissioner’s, Jowai, u Superintendent of Police ma Chemphang Syrti, BDO Dr. B. Langbang, Thadlaskein C&RD Block bad kiwei de ki ophisar sorkar na ki Department bapher bapher.
Ïa kane ka jingïalang la pynlong ha Conference Room jong ka ophis u DC, Jowai.
U bah A.L. Hek ula pynpaw ba ka jingthmu jong kane ka jingïalang ka long ban ïoh lum jingkheiñ halor ki jingjulor kiba la jia ha kine ki khyndiat sngi ba kynthup ïa ki jingdon jingem, ki lynti synkieng bad da ka jingthmu ban pynpoi ïa ki lad jingïarap hapoh 48 kynta khlem da pynslem sha kito kiba dei hok ban ïoh.
Na ka liang jong u ma Kyrmen Shylla ula ong ba ki tnat bapher ruh ki dei ban shim khia lang ïa kane ka jinglynshop mariang ym dei eh ba da ap sah haduh ba ka kynhun jong ka Disaster Management kin da poi ban shimti ïa ka jingjia. Ula ong ba na ka liang jong ka tnat ba dei peit ïa kane ka bynta kan sa pynïoh ïa ki lad jingïarap hapoh ka por, khnang ba kan long ka jingïarap ïa kito ki longïing kiba ïa kynduh ïa kane ka jingjia.
Na ka liang ki DC na baroh ar District kila wanrah ha khmat ka jingïalang ïa baroh ki jingjia ha ki bynta bapher bapher na ka jingther jong u lapbah, kumjuh ka jingwan lynshop jong ka eriong Remal. Kila ïathuh ruh ba la dep ban buh ïa ki Quick Response Team hapoh ki District jong ki, na ka bynta ban leit ai jingïarap ha ka por ba don ki jinglynshop bor mariang.
