Ka Hynñiewtrep Youths’ Council (HYC) Jaiñtia Hills District Unit mynta ka sngi 26 tarik u Risaw hapoh ka jingïalam jong u Organizing Secretary samla Phaitki Suna lem bad ki para dkhot kila leit ban aiti syndon da ka dorkhas sha u Deputy Commissioner ka West Jaiñtia Hills ban dawa maramot noh ïa u surok NH-6 Jowai-Shillong.
Kane ka jingsniew palat jong ka surok NH-6 kala pynlong ïa ka seng ban dap da ka jingsngewkhia halor ka jinglong jingman jong kane ka surok namar katba dang mih ki sngi ka surok kala nang buh satang ki thliew ki syar nalor ka jingbym biang sa ki nala um narud jong ka surok.
Na ka liang ka seng ka buh ka jingkyrpad na utei u khliehduh ka District ba un shimkhia ïa kane bad ban ïakren bad ki bor ba dei peit ban maramot kloi (Emergency Repair) ïa ka surok ha kine ki kyndiat sngi, khnang ba kan long kaba shngaiñ ka leit ka wan jong ki paidbah.
Kumba long mynta ka seng kala ïathuh tang ban leit na Jowai sha Shillong kala shim por da ki bun bun kynta, kaba la kot haduh 3 ne 4 kynta wat ki kali ba ïaid na kane ka surok kila shem shitom na ka jingkhohruh khohram ka surok nalor sa ka jingsniew sa ki kali heh hapdeng ka surok.
Shuh shuh na ka liang ka seng kala ïoh jingtip ba ïa une u surok la dep ban sanction lyngba ka skim Meghalaya Integrated Transport Project (MITP) hynrei haduh mynta kane ka project ka khlem pat sdang ka jingpyntreikam.
Ka seng kala kren shai lada ka sorkar ka dang buhteng ban maramot ïa ka surok da kaba ai por hapoh 2 taiew na ka liang ka seng kam banse ban shim da kiwei pat lynti kiba tyngeh. Ka seng kala buh ruh ka jingkylli da kaba ong ‘hato kum ki paidbah ka Ri-Lum Jaiñtia kim don mo ka hok ban dawa ïa ki jingmyntoi kiba bun ba lang na ka sorkar’.