-Byrthen ki paidbah ban sangeh ka leit thep vote MDC lada bakla ka rukom phiah-
![](https://i0.wp.com/yutipnews.com/wp-content/uploads/2024/07/IMG-20240709-WA0020.jpg?resize=640%2C360)
![](https://i0.wp.com/yutipnews.com/wp-content/uploads/2024/07/IMG-20240709-WA0024.jpg?resize=640%2C360)
Ka Delimitation Committee jong ka Jaiñtia Hills Autonomous District Council kaba la pynlong mynta ka sngi 9 tarik u Naitung, 2024 ban pynsngew paidbah (Public Hearing) ïaka Draft Delimitation ïaki Constituency ne ka jingphiah ïaki Constituency ka JHADC, shi bynta naka MDC Election.
Kane ka Public Hearing jong ka Delimitation Committee haka sien kaba ar la pynlong mynta ka sngi ba ar ha District Library Auditorium Mynthong, Jowai naka bynta ki 16 tylli ki Constituency kiba kynthup ïaka Amwi-Khliehtyrshi, Mukhla-Ummulong, Moodymmai-Nongkhroh, Wahiajer-Kyndong, Moodop-Umladang, Mynso-Nongjngi, Mynsngat-Khanduli, Shilliangmyntang-Namdong, Barato-Mukroh, Mootyrshiah-Saphai, Sahsniang-Mokaiaw, Raliang, Shangpung, Jowai-North, Jowai-Central bad ka Jowai South Constituency.
Na ka liang ki nongïalam shnong kiba hap hapoh kitei ki Constituency kila wan poi khnang sha kane ka jingïalang ban pynsngew ïaki jingmut jong ki sha ka Delimitation Committee kaba dei ka kynhun laitluid (Independence body) ka ban pynbeit bniah ïa ka Draft Delimitation jong ki Constituency.
Ha kane ka jingpynsngew kiba bun hi na ki Nongïalam Shnong hapoh kitei ki Constituency kila pyrshah jur ïa kane ka Draft Delimitation ba thymmai. Hynrei ki don ruh katto katne tylli ki shnong kiba mynjur ïa kane ka jingphiah Constituency.
Kiba bun napdeng kitei ki Constituency kila pynpaw ka jingpyrshah jur ïaka Delimitation Committee ka JHADC kaba la pynbeit ïa ki Constituency thymmai khlem da kynjoh ktien shwa ïa ki nongïalam shnong halor ka jinglong jingman jong ki shnong ki thaw, namar kane ki don ruh ki shnong kiba pynhap jubor sha kiwei pat ki shnong bad kane kala buh jingeh ïa ki ban leit thep vote haka lynti kaba jngai.
La don ruh kiba pynsngew kane ka jingphiah thymmai ïaki Constituency kam ïahap satia bad ka kyrteng jong kitei ki shnong, lada kumne la donkam ban pynkylla kyrteng noh ïa ki Constituency namar ka paw beit ïa ka rukom buh kyrteng ïaki Constituency.
Kiba bun hi ki nongkren ha kane ka sngi kila pynsngew kaba biang eh dei ban leh katkum ki Constituency kiba rim, hynrei lada ym lah ban pynbeit ïa kane kila kren shai ba kin sangeh syndon ïa ka jingleit thep Vote bad ki don ruh ki nongïalam shnong kiba ong kim banse ban pynlong noh da ki jingïakhih ba jur bad ban kiew shaduh ka ïing lieh ïing saw.
Na ka liang ka Delimitation Committee kala ai por ïa ki paidbah ba kin phah da ka jingthoh jingujor sha ka Committee bad ïa ki jingthoh yn pdiang haduh ka 3 baje janmiet jong ka 19 tarik mynta u bnai Naitung 2024.
La pynkut ïa kane ka jingpynsngew paidbah da ka jingkren ai khublei na u bah P. Shylla, uba dei u Secretary jong ka Delimitation Committee JHADC.
![](https://i0.wp.com/yutipnews.com/wp-content/uploads/2024/07/IMG-20240709-WA0019.jpg?resize=640%2C360)
![](https://i0.wp.com/yutipnews.com/wp-content/uploads/2024/07/IMG-20240709-WA0017.jpg?resize=640%2C360)
![](https://i0.wp.com/yutipnews.com/wp-content/uploads/2024/07/IMG-20240709-WA0018-1024x576.jpg?resize=640%2C360&ssl=1)
![](https://i0.wp.com/yutipnews.com/wp-content/uploads/2024/07/IMG-20240709-WA0016-1024x576.jpg?resize=640%2C360&ssl=1)
![](https://i0.wp.com/yutipnews.com/wp-content/uploads/2024/07/IMG-20240709-WA0009-1024x576.jpg?resize=640%2C360&ssl=1)