U Myntri Rangbah ka Jylla u Conrad K. Sangma ula ong ba hapoh ka skhim kyrpang jong ka sorkar kaba la tip kum ka FOCUS bad ka FOCUS plus kila don haduh 4.5 lak ngut ki nongshong shnong jong ka jylla kila ioh jingmyntoi na ka.
Ula ong ruh ba na ka liang ka sorkar jylla kala dep mang haduh T.500 klur na ka bynta kane ka skhim.
Haba kren sha ki 3000 tam ki nongrep, ki seng samla bad ki nongshong shnong na ki jaitkam bapher bapher ha Baghmara mynta ka sngi, u Conrad Sangma ula ong ba ka sorkar kan bteng ban kyrshan ia ki nongrep bapher bapher bad pynthikna ia ki samla jong ka jylla ba ki lah ban ioh ka jingiarap na ka sorkar lyngba kine ki skhim kiba la mang kyrpang.
Na ka liang u Myntri Rangbah ula sam ruh ia ki cheque hapoh ka skhim FOCUS bad aiti ia ka FOCUS plus Card sha ki nongioh jingmyntoi jong kane ka thaiñ. Ula aiti ruh ia ki cheque hapoh ka Yess Meghalaya sha ki kynhun jong ki samla bad sha ki kynhun ba ri sniang, ri syiar bad sha kiwei de ki nongioh jingmyntoi jong ka District South Garo Hills.
Ha kane ka juh ka sngi u Conrad ula aiti ruh ia ka cheque sha ki Village Organisation jong ki SHGs kaba shongdor T.2.15 klur tyngka hapoh ka Community Investment Fund.
La sam ruh ia ki cheque hapoh ka skhim “Green Meghalaya” sha ki kynhun bapher bapher kiba iadon bynta ha kaba pynneh pynsah ia ka mei mariang.
