Ka Hynñiewtrep Youths’ Council (HYC), East Jaiñtia Hills District mynta ka sngi 20 tarik u Nailur kaba dei ka sngi pynkut ïa ka jingap bad talasi mynder ri kala ïoh ban pynphai kumba 35 ngut ki briew kiba thmu ban rung shapoh ka jylla khlem da don ki kot ki sla kiba biang.
Na ka liang ka seng kala pynbna ruh ba kan pynkut noh ïa kane ka jingap bad talasi kaba la long ha Ratacherra Infiltration Check Gate ïa kaba la sdang naduh ka 14/08/2025 bad pynkut haduh mynta ka sngi (20/08/2025), hynrei ka seng kan dang ïaibteng ban pynlong ka jingtalasi na ka por sha ka por.
Katkum ka jingkheiñ ba la ïohlum da ka seng naduh ka sngi sdang (14/08/2025) haduh ka sngi pynkut (20/08/2025), ka seng ka la ïoh ban pynphai haduh 183 ngut ki bar jylla kiba la pyrshang ban rung khlem ki kot ki sla kiba shisha shapoh u pud u sam ka jylla.
Ka seng ka ngeit skhem ba ka Infiltration Check Gate kan dang ïai pyrkhing ban peit pyrman bha, khnang ba kino kino kiba mut ban rung shapoh ka jylla jong Meghalaya khlem da don ïa ki kot ki sla kiba biang kin nym ïoh lad shuh, pynkut ka kyrwoh na ka seng.
