U Deputy Commissioner, ka East Jaintia Hills District u Shivansh Awasthi, IAS, ula pynmih ia ka hukum ba la thung ia ka Joint Enquiry Committee ka ban bud dien halor ka jingjia ba don ki khynnah skul jong ka skul Jawahar Navodaya Vidyalaya (JNV), kaba don ha shnong Rymbai, East Jaintia Hills kila kem pang na ka jingsuba long bih jong ka jingbam kaba la jia ha ka 22 tarik mynta u bnai.
Ia kane ka Committee yn lamkhmat da u Sub-Divisional Officer (SDO)- Sadar, East Jaintia Hills District u Manish Kumar, IAS ryngkat bad ki dkhot kiba kynthup na ka Food Safety Officer (FSO), District Medical & Health Officer (DM&HO), Sub-Divisional School Education Officer (SDSEO) bad ka District Child Protection Officer (DCPO, East Jaintia Hills District.
La bthah ia kane ka Committee ba kan pynlong ia ka jingjurip kaba bniah ban lap ia ka daw jong ka jingkem pang jong kitei ki khynnah skul bad ia jingsuba long bih ka jingbam. Kane ka Committee kan hap ban phah ia ka kaiphod (report) sha u DC ka East Jaintia Hills District hapoh ka shitaiew.
