Ka Joint Action Committee Nartiang Khanduli (JACNK), kaba la lam khmat da ki Waheh Shnong jong katei ka thain, mynta ka sngi 21.04.2023, lyngba ki 6 ngut ki Waheh Shong ha ka jinglamkhmat u Chairman ka Committee uba long u Waheh Shnong jong ka Shnong Moodop Nartiang u ma Damonmi Dkhar, kila hiar ban leit jurip (Inspect) sha katei ka jaka ha Khanduli halor ka jingjia huri hura kaba la mih ha katei ka jaka ha kine ki sngi kiba la dep, ha kaba ka Karbi Anglong Autonomous Council (KAAC), kala buh ia ka Entry Gate ban khrong khajna ha katei ka jaka.
Na ka liang ka JACNK kala dawa ban weng mardor ia katei ka Check Gate, kaba la buh ne shna hapoh u pud u sam jong ka shnong Khanduli kaba hap hapoh ka jylla Meghalaya. Ka Committee kala ong ruh ba kane ka Check Gate ka kthah ia ki nongleit nongwan kumjuh ruh ki nongkamai kajih ne kiba trei sha katei ka jaka, sa kawei ruh ha katei ka Gate nalor ba kila khrong khajna na ki kali kit mar (Commercial Vehicle), kila khrong ruh ia ki nongwan jngohkai pyrthei ne ki Tourist.
Kumta ka Committee kala dawa ban weng syndon ia katei ka Check Gate khnang ba ki nongleit nongwan bad ki nongkamai kajih kin suk khlem don ka jingpynthut. Ka Committee kala pynrem jur ruh halor ka jingkam jong ka DC ka West Karbi Anglong ba ka shnong Khanduli ka dang hap hapoh ka District jong ka Karbi Anglong, ha kaba kane ka dei tang ka jingkam khlem nongrim ka jong ka iaka shnong Khanduli, namar kane ka shnong Khanduli naduh mynshwa ka dang hap hapoh u pud u sam jong ka jylla Meghalaya.