U MLA ka Jowai u ma Wailadmiki Shylla mynta ka sngi Thohdieng ula leit jurip dalade ïa ka jaka pynlang bad pynkhuid um (Treatment Plant) jong ka tnad PHE kaba don ha Urkhla Khimusniang, Jowai.
Kane ka jingleit jurip jong u MLA ka long ban tip halor ka jinglong jingman jong ka umbam umdih kaba pynpoi sha ki thliew ïing kiba don hapoh ka nongbah Jowai, namar ha kine ki khyndiat sngi kala don ka jingud jingnam da ki nongpyndon kam umkor ba ka um ka long kaba jakhlia bad sma iwtung bad ka bym long shuh ban pyndonkam.
Ha ka jingjurip u MLA ula ïohlad ban ïakren bad phylliew jingmut bad ki ophisar bad nongtrei jong ka PHE halor kane ka jinglong jingman jong ka umkor. Ha ka jingjurip mynta ka sngi, la lap ba ka umkor kaba pynpoi da ka PHE kala long kaba la khuid bad kaba la biang ban pyndonkam ïa ka.
Kat kum ka jingïathuh jong ki ophisar jong ka PHE la ong ba ka jingjakhlia jong ka umlor ha kine ki sngi bala dep ka dei na ka jingjur palat u slap nalor ka jingbret pathar ïa ka kyndew kala don ka jingshah ktah jong ka Wah Myntdu, haduh ba ka um kaba poi haka jaka pyllang bad pynkhuid umbam ha Urkhla kala kylla ktieh.
Ïa u MLA la synran lang mynta ka sngi da u EE jong ka tnad PHE Electrical ma P. Synnah, u SDO ma K. Challam, ki katto katne ngut ki nongïalam shnong bad ki nongtrei jong katei ka tnad PHE.
Na ka liang u MLA ula jurip kumjuh ïa ki kor tan um (Pump) ba pyndonkam ha kaba tan ïa ka umbam, ula ai jingmut ruh ban pynbha shuh shuh ïa ki kor ki bor ba pyndonkam ban tan um, da kaba buh noh da kiba thymmai katkum ka juk ba mynta.
Kumba long mynta u MLA ula lap ba ka umbam kala long kaba la biang ban pyndap umbam ïa ki paidbah nalor ka jingdonlang jong ka umbam kaba wan na ka Wah Umngot.
U ma Wailadmiki Shylla hadien kane ula leit jurip sa ïa ka Govt. Girls Higher Secondary School Jowai kaba la shah pynjulor haki bor mariang ha kine ki sngi bala dep da ka jingwan hap u slap haduh bala pyntwa ïa ka kynroh bad kiwei de ki bynta jong ka skul.
Na ka liang u MLA ha ka jingïakren bad ki bor pynïaid jong ka skul, ula kular ban ïakren bad ka tnad PWD ban kan pynkloi ïa ka kam bad ban pynbha pynmiat ïa ki bynta ba shah pynjulor jong katei ka skul.
