Ka Federation of Khasi Jaiñtia and Garo People FKJGP – West Jaiñtia Hills District ha ryngkat ka Synjuk ki Waheh Chnong War Jaiñtia mynta ka sngi 13 tarik Nailar kila leit hiar sha khappud jong ka shnong Dawki bad ka Ri Bangladesh.
Ha kane ka jingleit hiar ka FKJGP kila ïoh lad ban leit ïa kynduh shwa ïa u Officer in charge ka Dawki Police Station bad kyntu ban pynjur ka jingpahara ha ki jaka khappud daka jingïatreilang bad ki bor shnong.
Nangne ki dkhot ka seng kila leit sha ki jaka pahara jong ki shipai BSF naduh Riahjalong haduh Amdoh bad la lap ïa ka jingduna ka jingdon ki shipai BSF ha ki jaka khappud, wat ki jaka ap pahara jong ki shipai ki long kiba thylli.
Ha kane ka sngi ka seng kala lap ruh ïa ki nong Bangladesh kiba shna ïa ki ïing hajan jong u maw pud (pillar) jong ki ar Ri.
U President ka Synjuk Waheh Chnong u Twinson Rymbui bad u General Secretary u Kampher Pohlong kila pynpaw ka jingsngewkhia halor ka jingduna ka jingdon ki shipai BSF ha kum kine ki por ba don ka jingïakhajia ha Bangladesh kaba la pynbor ïa ki katto katne ki rit paid ban rung tuh shapoh India.
Kila buh ruh ka jingkyntu na ki bor sorkar ba kin tehlakam ïa kane ka jingïoh rung tuh ki nong Bangladesh kaba lah ruh ban ktah ïa ka shongsuk shongshngaiñ.
Katba na ka liang u ma Damien War u President ka FKJGP West Jaiñtia Hills ula ong ha kane ka jingwan jurip ïa ki jaka khappud, la lap ba ka don ka jingshah pynjulor ki sainar siah ha khappud kaba la pynsuk ïaki nong Bangladesh ban ïoh rung suk shapoh ka Ri India.
